Оваазын дагаан
Таңды кожууннуң чурттакчы чону Чагытай хөлдүң эриинде турар ыдыктыг овааның дагылга ёзулалын демнежип эрттиргеннер.
Оваа дагыыры дээрге черниң ээлеринге чүдүүрүнден эгелээш, кижилерниң кылган ажылының үре-түңнелин көөр ёзу-биле холбаалыг тыва чоннуң бир онзагай сүзүглели болгаш байырлалы болур.
Чагытай хөлдүң эриинге ыяш оваа мооң мурнунда чүс чылдар дургузунда черле турган дээрзин төөгү бадыткап турар. Эртем-шинчилелдеринге, хоочуннарның сактыышкыннарынга даянып тургаш, овааның эргиде турган черин тодарадып, 2018 чылдан эгелеп Таңды кожууннуң чону черинге, хөлүнге мөгейип, чемниң дээжизин отка салып, оваа дагыыр езулалды эрттирип эгелээн.
Езулалга киржип, ачы-буян, чаагай чоруктуң номун номчаан Эрес башкы оваа дагыырынга таарымчалыг хүн болганын демдеглээн.
Айыыл чок чорук дээш 100 чыл
Бии-Хем кожууннуң Марк Оюн аттыг культура бажыңынга Тыва Республиканың Өрттен камгалал албанының 100 чылдаанынга тураскааткан юбилейлиг концерти болуп эрткен.
Аңаа ук албанның ажылдакчылары болгаш хоочуннары байыр чедириишкиннерин база эрес-дидим, карак кызыл ажылы дээш чылыг-чымчак сөстерни дыңнаан. Концерт чыылганнарга байырланчыг байдалды сөңнээн.
Тывада ОБЯ-ның ТР-де кол эргелелиниң “Эне-Сай” чогаадыкчы коллективиниң киржикчилеринге болгаш организакчыларынга Бии-Хем кожууннуң чагыргазы Өрттен камгалал албанының 100 чылдаанынга тураскааткан кайгамчыктыг концерт дээш сеткилиниң ханызындан өөрүп четтиргенин илереткен.
Ак-Хемге хой кыргылдазы
Июнь 20-де Мөңгүн-Тайга кожууннуң Мөген-Бүрен сумузунуң Ак-Хем деп черге чаңчылчаан хой кыргылдазынга мөөрей болуп эрткен.
Аңаа кожууннуң арга-дуржулгалыг кыргыкчылары болгаш чурттакчы чону чыглып, өгбелерден дамчып келген чаңчылчаан мал ажыл-агыйынга бердингенин, мергежээнин, ажылгыр-кежээзин көргүскен. Маргылдаа эп-найыралдыг байдалга эрткен. Ол оон аңгыда ниити ажыл-агыйлыг кижилерни каттыштырып, ужураштырар шөлчүгеш болган.
Шак мындыг хемчеглер амыдыралдың чаңчылчаан ажыл-агыйын кадагалап арттырбышаан, сайзырадырынга, малчыннарның арга-дуржулгазын аныяк салгалга дамчыдып, оларның ажыл-агыйынга хүндүткелди бедидеринге ажыктыг.
Мөөрейниң киржикчилеринге малчын кижиниң мергежилин болгаш чаагай чаңчылдарын кадагалап арттырарынче чүткүлү база маргылдаага идепкейлиг киришкени дээш кожуун чагыргазы өөрүп четтиргенин илереткен. Маргылдааның эрттирикчилеринге, деткикчилеринге болгаш хемчегни эрттиреринге база аңаа белеткениринге дузазын каткан бүгү-ле кижилерге онзазы-биле четтиргенин илереткен.
Тес-Хемниң мөңгүн волонтерлары 10 чылдаан
Тес-Хем кожуунга “Туглуга” хоочуннар клуву 10 чыл болган оюн байырлыг байдалга демдеглеп эрттирген. Ол анаа-ла байырлал эвес, а улуг назылыгларга хүндүткелди, бистиң ёзу-чаңчылдарывыска чоргааралды көргүскени-дир.
Юбилейлиг хемчегни Тывада Тургузукчу күш-ажылдың болгаш өг-бүле ыдыктарының чылынга тураскааткан.
Мөңгүн волонтерларга өөрүп четтиргенин илередип, клубтуң бүгү-ле идепкейжи кежигүннеринге сагыш човангыры болгаш эрес-дидими дээш хүндүлел бижиктер-биле шаңнаан.
Ол ышкаш кожууннуң бүгү-ле сумуларындан Иелер болгаш Хоочуннар чөвүлелдери база Кызылдың Иелер чөвүлели чыылганнарга байырын чедирген.
Чыылган аалчыларның хей-аъдын көдүрген кайгамчыктыг концерт-биле хемчег доозулган.
Баян-Тала суурну үерден камгалаан
Баян-Тала суурга үер айыылын эвээжедири-биле база эрик кыдыында чурттакчы чоннуң айыыл чок чоруун хандырары-биле эриктерни быжыглаар ажылдар чедиишкинниг доозулган.
Чадаананың хөмүр-даш уургайындан тывылган хая даштарын ажыглап тургаш, эрикти быжыглаан. “Восток” КХН-ниң 10 самосвалы, “Транспорт сервизи болгаш төлевилел” күрүнениң унитарлыг бүдүрүлгезиниң 1 тралы, 1 бульдозери дээш амгы үениң техникаларын хаара тутканы ажылды чогуур хуусаазында кылып доозарынга дузалыг болган. Ажылдың доостур хүнүнде хая даштарын сөөртүрү-биле шупту 20 рейсти кылганнар.
Шеми суурда шывыглыг спорт залының тудуу уламчылап турар
Чөөн-Хемчик кожууннуң Шеми суурда шывыглыг спорт залының тудуу уламчылап турар. Амгы үеде ында кирер эжик аксында чаданы тургузар база объектиниң эжиин эптээр ажылдар чоруп турар.
Шывыглыг спорт залы дээрге Шеми суурнуң чурттакчы чонунга чылдың кандыг-даа үезинде күш-культура болгаш спорт-биле өңнүктежиринге эптиг байдалды тургузар амгы үениң шиитпири-дир. Чаа залдың ажыттынары кадык амыдыралды суртаалдаарынга болгаш спортчу ёзу-чаңчылдарны кадагалап арттырарынга дузалыг улуг ужур-уткалыг болуушкун-дур.
Чыжыргана СААЯ белеткээн.
Медээлерни болгаш чуруктарны кожууннарның чагыргаларындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...