Мөңгүн-Тайгага…
Мөңгүн-Тайга кожуунга эрткен дыштаныр хонуктарда дараазында спортчу маргылдаалар болуп эрткилээн:
Эр улус аразынга ча адарынга маргылдаага бирги черни Ачыты Хертек, ийиги черни Мерген Доктугу, үшкү черни Аяс Иргит чаалап алган.
Арбаннар аразынга хол бөмбүүнге эр улус аразынга “Аян” арбанның командазы тиилекчи болган. Ийиги черге “Аржаан”, үшкү черге “Шуралгак” арбаннарның командалары төлептиг болган. Хол бөмбүүнге херээжен улус аразынга база-ла “Аян” арбанның командазы тиилээн. Ийиги болгаш үшкү черлерни “Шуугуур” биле “Ак-Баштыг” арбаннар үлешкен.
База бир кончуг солун маргылдаа – Соок-Ирейниң шаңналы дээш мячилиг чадаг хөккейге болуп эрткен. Аңаа кожууннуң төп эмнелгезиниң чыынды командазы тиилекчи болган. Мугур-Аксының 2 дугаар школазының чыынды командазы ийиги черни алган. Малчын аттыг команда үшкү черге төлептиг болган.
Чаа-Хөлдүң аныяктары
Январь 7-де Чаа-Хөл кожууннуң аныяктарының аразынга хол бөмбүүнге маргылдаа солун эрткен. Ниитизи-биле аңаа 9 команда киришкен. Түңнелинде Чаа-Хөл суурнуң “Бедик-Хавак” командазы тиилекчи болган. Ийиги черни Булуң-Терек суурнуң “Ак-Хем” командазы алган. Үшкү черге “Булуң-Терек” команда төлептиг болган.
Бай-Тайганың эр улузу хуралдаан
Эрткен неделяда Бай-Тайга кожууннуң Шуй сумузунуң эр хиндиктиг чонунга “Эр кижи кандыг болурул?” деп ажык чугаа хевирлиг чыыш болган. Аңаа Тываның Чазак Даргазының эрге-хоойлу талазы-биле оралакчызы Шолбан Сендаш, Тыва Республиканың ажыл-чорудулганың чамдык хевирлерин чөпшээреп, хайгаараар албанның начальниги Аяс Долаан, кожууннуң чагырга даргазы Чингис Салчак база Бай-Тайга кожууннуң айыыл чок чорук, кем-херек үүлгедиишкиннерин болдурбас болгаш хоойлу-дүрүм камгалаар талазы-биле чагырга даргазының оралакчызы Шолбан Кудурукпай олар хуралдың киржикчилери-биле чугааны чоруткан.
Ажык чугаа үезинде амыдыралга эр кижиниң туружу, сүлдези база арага садарының чуруму кандыг болза эки (хостуг, кызыгаарлыг) болгаш ниити корум-чурум дугайында айтырыгларны көдүрген.
Түңнелинде кайы-даа тала бот-боттарынга билчилгелиг болуп, ёзулуг эр кижиниң бедик сүлде-сүзүүн көдүрер сорулганы салганнар.
Таңдының доозукчулары
Эрткен дыштаныр хүннерде Таңдының Бай-Хаак ортумак школазының доозукчуларының аразынга чылдың эртер спартакиада болган. Аңаа 1991 чылдың доозукчуларының командазындан эгелээш шупту 24 команда киришкен.
Ийи хонук уламчылаан солун хемчегниң киржикчилери эстафета, турисчи армрестлинг, баскетбол, хол бөмбүү, канат тыртары, хүреш – спортчу маргылдаалардан аңгыда, «Эргим ынак чаңгыстарым» бот-тывынгыр уран чүүлге сундулуун болгаш ыр-шоор, танцы-самга база мөөрейлешкен.
Түңнелинде команданың ниити чаалап алган санының аайы-биле бирги черни 2020 чылдың доозукчуларының командазы чаалап алган. Ийиги болгаш үшкү черлерни 2012 биле 2010 чылдарның доозукчуларының командалары үлешкен.
/ К. МОНГУШ белеткээн.
Чуруктарны социал четкилерден хоолгалаан.
“Шын” №1 2026 чылдың январь 15