2024 чылдың декабрь 11-де Тыва Республиканың Дээди Хуралының дөрткү чыыжының бирги сессиязының ээлчеглиг хуралы болуп эрткен.
Тыва Республиканың 2025 чылда болгаш 2026–2027 чылдарда планныг үеде бюджедин тыва парламентиниң депутаттары хүлээп алган. Республиканың 2025 чылда бюджединде орулгалар 64,5 млрд рубль, чарыгдалдар 65,8 млрд рубль кылдыр көрдүнген. Бюджеттиң акша-хөреңгизиниң хөй кезиин, 60 хуузун кадык камгалалы, өөредилге дээн ышкаш социал адырларга үндүрер. Тываның экономиказының хөгжүлдезинге 19 637,9 сая рубльди, көдээ ажыл-агыйның сайзыралынга 921,5 сая рубльди тускайлаар. Сайгарлыкчы чорукту деткииринге 23 сая рубльди аңгылап бээр. Национал айыыл чок чорукка болгаш хоойлу-дүрүм камгалалының ажыл-чорудулгазынга 8,7 сая рубльди чарыгдаар. 2026–2027 чылдарда бюджеттиң планныг хемчээлдерин, орулгаларын болгаш чарыгдалдарын база бо кол документиде тодаргайлаан.
Федералдыг хоойлуларда өскерилгелер-биле холбаштыр ТР-ниң хоойлуларынга киирген өскерилгелерни Дээди Хуралдың депутаттары хүлээп алган. Регион чергелиг хоойлуларны база депутаттар хүлээп алган: “Тыва Республиканың муниципалдыг тургузугларының эрге-байдалының болгаш кызыгаарларының дугайында” хоойлуну, “Тыва Республикада тус чер бот-башкарылгазын организастаарының чамдык айтырыгларының дугайында” хоойлуну.
“Тыва Республиканың байырлал хүннериниң дугайында” хоойлуга дүүштүр болгаш Чөөн чүк календарын барымдаалап, Тывага 2025 чылда Шагааны март 1-де байырлап эрттирерин Дээди Хурал доктааткан. Март 1-де суботтада дыштанылга хүнүн март 3-түң хүнү понедельникче шилчиткен.
Ш. ЛОПСАН.
“Шын” №96 2024 чылдың декабрь 14