Колбасазы амданныг

Боду хууда ажыл-агыйлыг болуру аныяктарның аразында ажыл-ишке чедиишкинниг, амыдырал-чуртталгага бай-шыырак болурунуң эки демдээ апарган. Аныяктарның аразында хууда ажыл-агыйлыг оолдар, уруглар көвүдеп турар.

Бай-Тайга кожууннуң Тээли суур чурттуг Сайлык Конгар боду хууда ажыл-агыйлыг болур сорулгалыг чораан. Ону боттандырар арганы Сайлыкка социал керээ программазы берген. 2022 чылда социал керээни чаргаш, ооң акшазы-биле эът аймаандан кылган продукция ыштаар дериг-херекселди садып алган. Ону ажыктыг болгаш орулгалыг кылдыр ажыглаарынга тускай билиглер херек дээрзин ол билгеш, Россельхозбанкының шугуму-биле Фермерлер школазынче 2023 чылда өөренип киргеш, эътти болбаазырадырының технологиязын шиңгээдип ап, тускай дипломну холга алган. Төрээн сууру Тээлиге эъттен колбаса бүдүрер, эът, балык ыштаар биче цехти ажыткан. Сайлык Конгарның бүдүрүп үндүрген продукциязының шынары эки болгаш, тус черниң чурттакчыларының үргүлчү садып алыр чеми апарган.

2024 чылда аныяк сайгарлыкчы биче цегин улам сайзырадырының сертификат акшазы-биле бүдүрген продукциязын шыгжаар соодукчуну садып алган. Продукцияны улам хөйнү бүдүрериниң база бир байдалы ынчаар тургустунган.

Аныяк сайгарлыкчы Сайлык Конгарның чедиишкиннерин тус черниң эрге-чагыргазы бедии-биле үнелээн. Россияның сайгарлыкчылар хүнүн демдеглеп турда, Сайлык Конгарны Хүндүлел бижик-биле шаңнаан.
Тус черниң чурттакчы чону боттарының чурттап турар черинде биче бүдүрүлгелериниң продукциязын колдады садып алырын сайзыраңгай чурттарның арга-дуржулгазы бадыткаан. Чүге дээрге тус черде сайгарлыкчыларның чонунуң мурнунга харыысалгалыы кончуг.

Сайлык Конгар ышкаш сайгарлыкчыларның бүдүрген продукциязы көдээниң чурттакчыларының хереглелин хандырып шыдаар байдал Тывада тургустунуп эгелээни өөрүнчүг.

М. ЛОПСАН белеткээн.
Чурукту интернеттен алган.

“Шын” № 45 2024 чылдың июнь 19