Тыва Республиканың Күш-ажыл болгаш социал политика яамызынга социал керээ-биле күрүне деткимчезин алыр чагыгларны көөрү-биле, ээлчеглиг комиссия болган. Аңаа комиссияның кежигүннери 37 төлевилелди көрген: оларның 23-ү боттарының хууда херээн, а 14-ү дузалал ажыл-агыйын ажыдып алыр дээн улус, а 2 төлевилелди чедир ажылдап кылыр кылдыр чоруткан, артканнарының төлевилелдерин чүүлдүг деп көрген.
Бизнес-бодалдарның аразында: химчистка, далган кылыглары бүдүрер, ресторан бизнези, видеороликтер тургузар, техниктиг хандырылга станциязы, даш тывыжы, металл кылыгларын болбаазырадыр, штукатур болгаш маляр ажылдар бүдүрүлгези, ол ышкаш хуу дузалал ажыл-агыйже угланыышкыннар бар.
Ук төлевилелдер республика чадазынга эртер мурнунда, баштай муниципалитеттерге шилилгени эрткен. Ыраккы кожууннар чурттакчыларынга эптиг болуру-биле, видеоконференция кылдыр комиссия хуралын эрттирип турар.
Киржикчилерниң бирээзи Кур-Чер суурнуң чурттакчызы Алимаа Хертек. Ол фастфуд (дүрген кылыр аъш-чем) кылып ажылдап турар, ам бизнезин улгаттырар сорулгалыг. Ооң мурнунда Алимаа көдээ школага поварлап ажылдап турган. Пиццалар болгаш роллдар кылыр курстарга өөренип алгаш, ооң кулинарлыг арга-мергежили хереглелдиг деп чүүлдү билген. Ооң кылган чемин чиген улустуң эки үнелээшкиннери Алимааны хуу ажыл-агый ажыдып алыр сорук киирипкен.
Ам Алимаа бодунуң ажыл-херээн улаштыр сайзырадып база чаңгыс чер чурттугларын чаагай аъш-чеми-биле өөртүр дээш, чаа дериг-херексел садып алыр сорулгалыг.
Социал керээ — Тываның чурттакчыларынга боттарының ажыл-херээн ажыдып алыр болгаш күш-шыдалын боттандырар шынныг арга-дыр.
А. СОЯН белеткээн.
ТР-ниң Күш-ажыл болгаш социал политика яамызының медээзи болгаш чуруу.
“Шын” №29 2025 чылдың июль 31