Бир чыл бурунгаар декабрь 27-де 15118 шериг кезээниӊ улуг матрозу, БМП-3,40-ниң механик-чолаачызы Аӊчы Айдыңович Ортаат (Ооржак) 21 харлыында тускай шериг операциязынга киржип тургаш, частыышкынга таварышкаш, маадырлыы-биле амы-тынындан чарылган.
Аңчы Ортаат 2001 чылдың февраль 13-те Чөөн-Хемчик кожууннуң Чадаана хоорайга аалдың дун оглу болуп төрүттүнген. Ооң чашкы үези Шеми суурнуң “Чечек” уруглар садынга эрткен. 2017 чылда найысылал Кызылдың 3 дугаар школазының 9-ку клазын дооскан. Школачы үезинде спорттуң аңгы-аңгы хевирлеринге ойнап, маргылдааларга доктаамал киржип, удаа-дараа шаңналдыг черлерни ап чораан.
Школа соонда 2021 чылда Тываның көдээ ажыл-агый техникумунуң “Көдээ ажыл- агый техникумунуң механизациязы” деп салбырын дооскан. Ол эш-өөрзүрек, хөглүг-баштак, ырлаар салым-чаяанныг, ажылгыр-кежээ, арыг-силигге дыка ынак.
Техникумну дооскаш, улаштыр Приморье крайга хуусаалыг шериг албанын эрттирери-биле кыйгырткан. Ол-ла чылын декабрь айда Приморьениң Смоляниново дээр хоорайжыткан суурунга 15118 шериг кезээнге керээ чарып алгаш, харылзаа взводунуӊ телефончузу, харылзаачызы болуп ажылдап эгелээн.
2022 чылдың май 9-та Владивосток хоорайга Тиилелгениң улуг парадынга киришкен. Ооң соонда каш-ла хонук эрткенде, Украинада болуп турар тускай шериг операциязынче кыйгырткаш, ажылының аайы-биле июнь 1-де кирген. 40 дугаар бригаданың, БМП-3 деп шериг техниканың механик-башкарыкчызы апарган.
Аңаа база бодунуң эрес-дидим чоруун көргүзүп, мурнуку одуругже удаа-дараа кирип турган. Бир катап балыглангаш, эмчиге чыдарындан ойталап каапкаш, катап эштеринге катчып алгаш, ынчан база эрес-дидимин көргүскен.
2022 чылдың декабрь 26-да дүнеки хайгыылче үнгеш, ээп келбейн барган. Аңчы Ортаат боду ышкаш Ада-чуртун камгалаар быжыг даӊгырактыг шериг эш-өөрү-биле бердинген даалгазын күүседип тургаш, частыышкынга таварышкаш, декабрь 27-де маадырлыы-биле амы-тынындан чарылган.
Кады турган эштериниң сактыышкыны: «Аңчы бистиӊ аравыстан эң-не аныяк, дидим чүректиг, шупту улуска дузалажыксаар, ёзулуг эр турган. Декабрь 27-де Павловка суурже дүнеки дежурныйлаашкынче үнгеш, минага таварышкан. Шупту оруктарны эки билир, каяа-даа аспас кижи. Аңчы мурнуку одуругга амы-тынындан чарылган болгаш балыгланган дайынчы эштерин кезээде уштуп чоруп турган” – деп, дайынчы өөрү Аңчының коргуш чок, дидимин сактып чугаалаан.
Хуусаалыг шериг кезээнге кады турган дайынчы өөрү ТШО девискээринге чеде бээрге, омак-сөөк ылгавайн, шуптузун тыпкаш, ужуражыр.
Бир катап Аӊчы Ортаат балыгланы бергеш, эмнелгеге чыдып эмнениринден ойталааш, шарыдып алгаш, катап база тулчуушкунче үнүп келген. Ол дээш «Эрес-дидим чоруктуң» медалы-биле шаңнаткан.
Аныяк дайынчы Аӊчы Ортаат күрүнениӊ «Эрес-дидим чоруу дээш», Донецк Улус Республиканыӊ баштыӊыныӊ "Эрес-дидим чоруу дээш" деп медальдары-биле база «Шылгараӊгай эрес-дидим чоруктуӊ ордени-биле» шаӊнаткан.
Маадырывыстың чырык ады бистиң чүректеривиске мөңгези-биле артар.
А. ОРТААТТЫҢ чоок кижилери.