Делегейде халдавырлыг аарыгдан камгаланып, ону өөскүтпези-биле, Тываның херээжен чону боттуг дузаны көргүзүп, камгалал маскаларны даарааш, үлеп берип турар.
Ол ышкаш Херээженнер эвилелиниң Кызыл хоорайда даараныр мастерскаязында шеверлер хүнде-ле 60-70 маскаларны хөй катап ажыглаар кылдыр бөдүүнү-биле даарааш, албан черлеринге үлээннер. База Кызыл хоорайның, Тес-Хем кожууннуң херээженнер чөвүлелдериниң кежигүннери хөй уругларлыг өг-бүлелерге болгаш улуг назылыгларга дузазын көргүзүп турар. Чыргалаңды суурнуң чурттакчызы Маясуу Күнзеттиң «Дамырак» уруглар садынга маскаларны аргып бергенинге, ажылдакчылары өөрээн сеткилин чугаалааннар. Оон ыңай, бо кожууннуң херээжен чону чайгы үеде тайгадан шайларны чыып алгаш, хаптап белеткээш, үндүр садып турары онза, ылаңгыя ажыл чок аваларны бо ажылче хаара тутканнар. Улуг-Хем, Чаа-Хөл дээш өске-даа кожууннарны онзалаары чугула.
А Бай-Тайга кожуунну чижек кылдыр алыр болза, олар организмниң иммунитедин быжыктырарының дугайында тайылбырны чорутканнар. База эр улузу Даг-Баары деп черден саваларга аржааннап алгаш, чонга үлеп берип, эм шынарлыг сугну ижерин сүмелеп турарлар. Мөңгүн-тайгажылар база-ла чоогунда агып чыдар аржааннарны аксып алгаш, чурттакчыларынга эккеп берип, үлээннер. Республиканың суурларында херээженнер болгаш адалар чөвүлелдериниң кежигүннериниң хөй-ниити ажылдарынга кончуг идепкейлиин көргүзүп турары демдеглексенчиг.
Бистиң корр. #Шын