Республика Чазааның Аппарат хуралынга Росхереглелхайгааралдың удуртукчузу Людмила Салчак май–июнь айларда коронавирустуң чаа чал- гыы — "омикроннуң" бир хевири XBB 1.16 "арктур" деп халдавырлыг аарыг өөскүп болурун дыңнаткан.
Бүгү-делегейниң кадыкшыл организациязының дыңнатканы-биле алырга, апрельдиң эгезинде чаа вирус Индияга, Сингапурга база Австралияга кончуг дүрген тараан болза, амгы үеде 29 чуртта ук аарыг илереттинген. Россияның аңгы-аңгы регионнарында бөгүнде "арктур"-биле аараан дөрт таварылга бүрүткеттинген, а чайгы дыштанылга эгезинде аарыг оон-даа нептереп болурун баш бурунгаар дыңнадып турар.
Ук вирус дыка халдавырлыг дээрзин эртемденнер айытканын, Людмила Салчак чугаалаан. Амгы үеде чоруп турар "кракенден" улуг ылгал чок-даа болза, дүрген тараачал дээрзин ол демдеглээн. "Арктурдан" аараан кижилерниң караа кызып, кижидип, конъюктивиттей бээрин чурттуң медицина албаны дыңнаткан. Оон аңгыда, коронавирустуң ол хевиринден колдуунда-ла бичии уруглар аарыыр болуп турар.
“Чаа халдавырдан камгаланырының дүрүмнери кижи бүрүзүнге билдингир — хууда арыг-силигни сагып, масканы кедер, дезинфекциялыг арыглаашкынны күштелдирер” — деп, Людмила Салчак сагындырган. Эпидемиологтарның медээзинден алырга, эрткен неделяда Тывада коронавирус халдывырындан аараан таварылга бүрүткеттинмээн. Ооң мурнунда неделяда чүгле чаңгыс аарыг кижи бары демдеглеттинген. Стационарлыг болгаш амбулаторлуг эмнээшкинде коронавирустан аараан кижи чок. Халдавырлыг аарыг тарап-нептерээниниң хуузу тик, орун фондузу 100 хуу хостуг. Эрткен неделяда ОРВИ-лээн болгаш грипптээн кижилер саны бичии көвүдээн, ылаңгыя бичии уруглар оон аарып турары демдеглеттинген.
/ Бистиң корр.
"Шын" №32 2023 чылдың май 3
Коронавирустуң чаа хевири өөскүп болур
3 мая 2023
136