Февраль 5-те Чазак Бажыңынга Кыдатта нептерээн Коронавируска удур чоруп турар ажылдарга хамаарыштыр ээлчег чок хурал болуп эрткен. Аңаа республиканың яамылары болгаш албан черлери Чазак Даргазының оралакчызы Органа Натсактың башкарылгазы-биле киришкен.
ТР-де Росхереглелхайгаарал эргелелиниң даргазы Людмила Салчактың дыңнатканы-биле коронавирус тывылганының бир дугаар медээзинден тура, эрткен чылдың декабрь айдан эгелеп, вируска удур шупту хемчеглерни ап келген болгаш амгы үеде ажыл оон-даа күштелген. Кыдат Улус Республиканың Кадык камгалал яамызының дыңнатканы-биле, февраль 4-түң хүнүнге чедир 20 муң ажыг кижи аарааны демдеглеттинген. Мурнуку хүннерге деңнээрге, хүнде аарып турар кижилерниң саны кызырлып турар. Россия, ооң иштинде Тыва, камгаланырынга ажыглаар херек идик-хеп, эм-таң-биле четчелеттинген болгаш аңаа хамаарышкан органнар онза байдалга белен. Вирусту Тываже киирерин болгаш тарадырын болдурбазы-биле тускай планны ажылдап кылгаш, Чазак Даргазынга бадылаткан.
РФ-тиң Чазааның Айтыышкынын күүседири-биле Кыдатче виза чок аян-чорук үнүүшкүннерин түр соксаткан, Россияже ажылдап келир хамаатыларны чалаарын доктааткан болгаш январь 31-ден эгелеп, Россия — Моол кызыгаарында чамдык черлерде КУР-нуң хамаатыларының аргыжарын түр соксаткан. Республика иштинге Кыдаттан келген Россияның хамаатылары болур 2 кижиге коронавируска каразаан таварылга болган. Вирус бар-чогун илередири-биле анализти алгаш, Иркутск, Новосибирск хоорайларда лабораторияларже чоруткан соонда, коронавирус бадыткаттынмаан.
Декабрь айда Чаа чыл байырлалын уткуштур чуртунче чанган 248 ажылдакчының Кыдаттан кээриниң айтырыын «Лунсин» компанияның башкарыкчылары-биле чугаалажып турар. 5-тиң хүнүнде Россияже ужар билетти 10 ажылдакчы садып алганы илерээн. Бир эвес Россияже киириптер болза, 6-ның хүнүнде Тывага ужуп кээрин барымдаалааш, ажылдап турар чери Тожуда ажылчын суурга эмнелге пунктуларын болгаш оларны дүн-хүн чокка хайгааралга ап, ээлчежип ажылдаар эмчилерни болгаш бүгү херек чүүлдерни хандырары планда көрдүнген. Кыдаттан келген ажылдакчыларны 14 хонук иштинде хайгааралга ап, өске улус-биле харылзаазын болдурбас байдалдарны белеткеп кылган. Чүгле карантинниг хуусаазы төнерге, ажылче үндүрер-үндүрбезин шиитпирлээр.
Моолда 30 сургуул өөренип турар, оларның 28-и чанып келген, ийизи аңаа артар күзелин илереткен. А Кыдатта амгы үеде 2 сургуул бар, олар Кыдаттың талазындан карантинде турар болгаш, ол доозулгуже чурттан үнер эргези чок.
Кыдаттан Россияның хамаатыларын үндүрери-биле февраль 14-те тускай рейс планнаттынган. Тываже чанар деп турар сургуул бар болза, аңаа чедир кээр улустуң даңзызынче киирерин чогуур яамыга дааскан. Оон аңгыда, кожууннарда болгаш ыраккы бичии суурларда эм садып турар аптека чок черлерни илередип, ындыг черлерни камгалал маскалары болгаш кышкы үеде грипп вирузунга удур херек эмнер-биле хандырарын Кадык камгалал яамызынга дааскан. Кызылдың болгаш кожууннарның аптека эргелекчилерин чыггаш, чогуур эмнерни, маскаларны чедимчелиг кылдыр курлавырлаарын сүмелээр дээн ышкаш айтыышкыннарны Органа Натсак берген.
Аржана ЧАМЗЫРЫН.