Корум-чурум

Эрткен неделяда Чѳѳн-Хемчик кожууннуң чагыргазының хуралдаар залынга Тываның барыын талазында кѳдээ чурттакчылыг черлериниң даргаларының профилактика талазы-биле оралакчыларының семинар-хуралы болуп эрткен. Ону Тыва Республиканың Баштыңының регионда айыыл чок чорук департаментизи, Тываның Чазааның аппарады организастап эрттирген.

Тывада сайгарлыкчы чорук болгаш ѳске-даа ажыл-херектер чорудулгазынга лицензия тыпсыр болгаш хайгаарал чорудар албанның, Күш-ажыл болгаш социал политика, Кѳдээ ажыл-агый яамыларының, прокуратура, эрге-хоойлу болгаш барыын талакы кожууннарның тус чер чагыргаларының даргалары, оралакчыларының киржилгези-биле семинарга муниципалдыг тургузугларда криминалдыг байдалды, кем-херек үүлгедиглери болгаш ону болдурбазының талазы-биле иштики херектер ажылдакчыларының тус чер чагыргалары-биле кады ажылдажылгазын, кем-херек үүлгедиглерин болдурбазының талазы-биле муниципалдыг программаларның чедир боттанмайн турарын, эки турачы улусчу дружиналарның ажыл-чорудуун организастаары, бергелер, чедир шиитпирлеттинмейн турар айтырыгларын эртенги шакта семинарның киржикчилери сайгарганнар.

Хүннүң ийиги чартыында конопля болгаш хоралыг үнүштерни узуткаарынга белеткел ажылдарын, кожуун чагыргаларында админстративтиг ажыл - чорудулганың дугайында, хоойлуга удур алкоголь болгаш спирт холуксаалыг суксуннарны садып, сайгарып турарының байдалын, хоойлу хажыдыышкыннарынга удур демисел дугайында тайылбырны семинарның киржикчилери дыңнааннар. Хуралдың хүн чурумунга кирген айтырыгларга хамаарыштыр чогуур шиитпир хүлээп алдынган.

Вячеслав Монгуш