Эң-не эргим аваларга
Каа-Хем кожууннуң Сарыг-Септе В.Г. Иванов аттыг уругларның уран чүүл школазынга Авалар хүнүнге тураскааткан «Эң-не эргим аваларга!» деп байырлыг концерт болган.
Аваларынга, кырган-аваларынга уруглары ыры, самны база хөгжүмнүг шиини бараалгатканнар. Уран чүүл школазының театр салбырының өөреникчилери «За синей мечтой» деп шииниң үзүндүзүн күүсеткеннер. Эң-не эргим кижилеринге ынакшылдың болгаш өөрүп четтириишкинниң концерти уттундурбас солун болган.
«Ширбиилбол»
Авалар хүнүн уткуштур Улуг-Хем кожууннуң Арыскан сумузунга херээжен чон аразынга «Ширбиилбол» деп спортчу маргылдааны тус черниң депутаттары организастаан. Оюннуң киржикчилери болгаш көрүкчүлери уттундурбас сеткил-сагыш хайныышкынын алган.
Маргылдааның түңнелинде 1-ги черге «Аныяктар» командазы төлептиг болган, ийигизинге – «Почтальоннар», үшкү черге «Чагырга» командазы тергиидээн.
Кожууннар хүнү
Ноябрь 21-де Тываның күрүне университединге «Кожууннар хүнүн» чаңчыл ёзугаар организастаан. Ол хүн Бай-Тайга кожууннуң баштыңы Р.А. Аракчаа, чагырга даргазы Ч.Ю. Салчак, социал политика талазы-биле оралакчызы А.П. Сарыглар баштаан сумуларның чагырга даргалары, удуртукчулары чаңгыс чер чурттуглары студентилер-биле ужурашкан.
Ужуражылга үезинде эки өөредилгелиг, спортчу, чогаадыкчы база хөй-ниитижи студентилерни шаңнап-мактаан. Ол ышкаш Бай-Тайганың сураглыг ыраажылары, артистери концерт программазын бараалгаткан.
Берт-Дагның школа музейи
Тес-Хем кожууннуң Берт-Даг ортумак школазының төөгү болгаш чурт-шинчилел музейи Бүгү-российжи мөөрейниң регионалдыг чадазының тиилекчизи болган.
Школа музейлериниң мөөрейинге ук школаның тергиин өөреникчизи Долзат Сыраттың маадыр кырган-авазы Долзат Демчиковна Намзырайның төөгүзүнге тураскааткан видеоролиги тиилээн. Дуржулгалыг башкы Долаана Владимировна Монгалдың удуртулгазы-биле кылган видеоролиги жюриниң улуг үнелелин чаалап алган. Шаңналынга школа музейинге мебель садып алыр сертификатты алган.
Чагырыкчының хайгааралында
Ноябрь 21-де Таңды кожууннуң ЕДДС албанынга «Бай-Хаак-Тепло» КХН-де авария болган дугайында медээ келген: ийи черде хоорзалар дежилген.
Таңды кожуун чагырыкчызының хүлээлгезин күүседип турар А.Н. Конгар таварылга болган черже дораан четкеш, байдалды хайгааралга алган. Бүдүрүлгениң ажылчыннарының демниг болгаш шудургу ажылының түңнелинде үрелиишкинни чайлаткан.
Шыдыраа азбуказы
Ноябрь 21-де Каа-Хем кожууннуң Бүрен-Хем сумузунда «Солнышко» уруглар садынга «Шыдыраа азбуказы» деп шыдыраа клувун байырлыг байдалга ажыткан.
Шыдыраа клувунуң ажыдыышкынынга Бүрен-Хемниң салым-чаяанныг шыдыраачызы А.К. Бимба, шыдыраа башкылары Ш.М. Монгуш, С.С. Куулар, А.С. Биче-оол, өөредилге эргелелиниң удуртукчузу З.А. Монгуш база ада-иелер чаштарга байырын чедиргеннер.
Байырлыг байдалга Дамба Монгушту, Ванесса Биликтини, Булат Күскен-оолду, Сайнаш Бичелдейни, Начын Сегбени, Асель Лакпаны, Даваа-Серин Ооржакты, Виктория Салчакты чалыы шыдыраачылар одуруунче хүлээген.
/ Арынны А. СОЯН белеткээн.
Чуруктарны кожууннарның социал четкиде арыннарындан алган.
“Шын” №46 2025 чылдың ноябрь 27