Дина Оюннуң белектери
Барыын-Хемчик кожуунда Чаа чылдың байырлалдары эгелээн. Ак-Довурак хоорай, Барыын-Хемчик, Бай-Тайга кожуундан чоруткан тускай шериг операциязының дайынчыларының ажы-төлүнге организастаан Шиви байырлалынга Россия Федерациязының сенатору Дина Оюн аалдап келген.
Байырлалды Барыын-Хемчик кожууннуң Х.С. Саая аттыг хөгжүм-шии театрының коллективиниң «Бөрү болгаш чеди анай чаа езу-биле» деп (режиссеру А.К. Хомушку) хөгжүмнүг тоолу-биле эгелээн.
Волонтерларның организастааны янзы-бүрү оюннарынга уруглар күзелдии-биле киришкеннер. Шиви байырлалында уруг бүрүзү Дина Оюндан чигирзиг белекчигештерни алган.
Бо хемчегни эрттирген кол сорулгазы – Ак-Довурак хоорай болгаш Барыын-Хемчик, Бай-Тайга кожууннарның шериг албанныгларының ажы-төлүн деткиири.
«Он-Кум» ам база тергиидээн
Делегей чергелиг «Москваның кубогу» хореография мөөрейинге үлегерлиг «Он-Кум» театры тиилекчи болган. Мода болгаш костюм театрының бичии самчыларынга улуг чедиишкиннерни күзедивис.
40 дагаа
Барыын-Хемчик кожууннуң Эрги-Барлык суурунуң чурттакчызы Чойган Донгак бо чылын апрель айда Чонну ажылга хаара тудар төп-биле социал керээ чарып алган. Ол алган деткимче акшазы-биле 40 дагаа садып алгаш, оларын кызымаккай азырап кирипкен.
Чойган Кызыл-ооловна дагааларын чидириг чок өстүрүп алган. Ам артыкшылдыг чуургаларын чонунга саткаш, өг-бүлезинге орулга киирип ап турар.
«Дош фантазиязы»
Декабрь 21-ден 26-га чедир Туран хоорайның Ленин шөлүнге «Дош фантазиязы» деп доштан скульптуралар кылырының мөөрейин чарлаан. Бо мөөрейни Бии-Хем кожууннуң 90 чылдаан оюнга тураскаадып эрттирип турар.
Мөөрейни декабрь 26-да түңнээш, тиилекчилерни шаңнап-мактаар.
/ А. АРАКЧАА белеткээн.