Чай кээрге-ле, Кызылда “Азий диптиң төвү” скульптурлуг комплекс доозукчуларның чыглыр чери апаар дээрзин шупту билир бис. Эрткен хүннерде Кызылдың А.Б. Чыргал-оол аттыг уран чүүл колледжизиниң доозукчуларынга дипломнар тыпсыр байырлыг хемчег база аңаа болуп эрткен. Бо чылын колледжти шупту 56 кижи дооскан. Колледж студентизиниң сөөлгү балы база аңаа эрткен.
Колледж доозукчулары шупту культура адырының аңгы-аңгы адырларынга ажылдаар эргени берип турар быжыг билигниң документизи – дипломнарны холга алганнар. Оларның аразындан 9 кижи кызыл диплом-биле дооскан.
Доозукчуларның башкылары, ада-иези, эш-өөрү, чоок улузу шупту чыглып, байырлыг хемчегге киришкен. Аңаа ТР-ниң Культура яамызының мурнундан сайыттың бирги оралакчызы Айлана Бижик доозукчуларга байыр чедиргеш, шилип алган чогаадыкчы ажыл-агыйынга, амыдырал-чуртталгазынга чедиишкиннерни күзээш, оларга билиин харам чокка сөңнээн башкыларга келир үениң культура ажылдакчыларын белеткээринге киирген үлүг-хуузу дээш, четтиргенин илереткен. Оралакчы сайытка улай колледжтиң директору Айлаңмаа Каң-оол чыылганнарга байыр чедиргеш, доозукчуларынга чедип алган чедиишкиннеринге доктаавайн, улам сайзырап, күш-ажылга, шилип алган мергежилинге ынак болуп, ол-ла хевээр кижизиг мөзү-шынарлыг, хөй эш-өөрлүг, энерел сеткилдиг, бурунгаар чүткүлдүг болурун күзээн. Ол ышкаш сагыш-сеткилинден чылыг-чымчак эки күзээшкиннерни колледжтиң өске-даа башкылары доозукчуларынга чугаалап, амыдыралдың делгеминче дидим шымнып киргеш, чоннуң чоон оруун чандыр баспайн, эртем-билигге чалгынналып, чоргаар чоруурун күзээннер. Харыызынга быжыг билигниң документизин холга алган доозукчулар башкыларынга, ада-иелеринге четтиргенин илелердип, боодал чечектерни сунганнар.
Ортумак тускай эртемни чедип алган доозукчуларның чамдыызы культура болгаш уран чүүл талазы-биле улаштыр дээди эртем чедип алыр күзелин илереткен.
Диплом алыр мурнунда, доозукчуларның чаңчылы ёзугаар чараш вальска бөөлденген келир үениң культура ажылдакчыларын башкылары, ада-иелери болгаш чыылганнар магадап көрген.
Бо доозукчуларның боттарының мурнунда салган сорулгаларын албан чедип алыр, ажыл-агыйынга профессионал бедик деңнелин көргүзүп, республиканың культуразының хөгжүлдезинге эвээш эвес үлүг-хуузун киириштирер дээрзинге болган байырлалдың киржикчилери шупту бүзүреп тараан.
/ Бистиң корр.
Чуруктарны ТР-ниң Культура яамызындан алган.
“Шын” №25 2026 чылдың июль 2
"Шын" солуннуң МАХ-каналынга каттыжыңар: max.ru/join/egenQ...