Чазак Даргазы Владислав Ховалыг ТР-ниң Дээди Хуралынга Айыткалынга чурттуң Президентизи Владимир Путинниң культура политиказы келир үениң салгалдарының эки мөзү-шынарлыг, чогаадыкчы болгаш социал кижизидилгезин хевирлээринге улуг рольду ойнаар дугайында шиитпирлерин онзагайлап демдеглээн.
“Мында улуг харыысалга культура болгаш өөредилге адырларында дүжүп турар. Бо талазы-биле яамылардан кады ажылдажылганы чорудары-биле төлевилелдерни ажылдап кылырын диледим. Ынчангаш Тываның суурларынче “Культурлуг десантыны” организастап турары чугула деп санаар мен.Тываның тергиин дээн чогаадыкчы коллективтериниң, уран чүүлдүң мастерлериниң концерттери-биле кожууннарже үнүүшкүннерин күштелдирип, чон-биле ужуражылгалар болгаш мастер-класстарны эрттирерин ам-даа уламчылаар болза эки” – деп, Тываның Баштыңы чугаалаан.
ТР-ниң Культура яамызының төлевилели ёзугаар, чыл эгезинден тура “Культурлуг десант” кожууннарже гастрольдап эгелей берген. Культура сайыдының демдеглээни ёзугаар, үнүүшкүннер чүгле концерт көрүлдези-биле кызыгаарланмас. Чижээ, сценада концерт чоруп турда, клубтуң фойезинге ном болгаш музейниң делгелгелерин албан организастаары көрдүнген.
Тываның Национал оркестри бо хүннерде Тожу кожуунда гастрольдап турар. Олар концерт көргүспүшаан, суур бүрүзүнүң чурттакчылары-биле солун ужуражылгаларны, мастер-класстарны эрттирип турар. Февраль 20-де Ий суурга, 21-де – Адыр-Кежигге, 22-де – Доора-Хемге оюн-көргүзүүн бараалгаткан.
ТР-ниң Культура яамызының медээзи болгаш чуруу.
“Шын” №14 2024 чылдың февраль 24