Регионалдыг диспетчер албанының июль 28-те берген медээзи-биле алырга, республика девискээринде 611,6 гектар ниити шөлдүг 18 арга-арыг өрттери демдеглеттинген, оларның 17-зи хыппышаан, а 27 гектар шөлде 1 өрт өжүртүнген.
Элегестиң, Бай-Хаактың, Самагалдайның, Арыг-Үзүүнүң, Чадаананың, Чыраа-Бажының, Сүт-Хөлдүң, Сарыг-Септиң, Сизимниң, Кунгуртугнуң, Хову-Аксының, Ак-Дуругнуң арга-арыг участоктарының девискээрлеринде өрттер бүрүткеттинген. Республиканың Арга-арыг болгаш бойдус ажыглалының яамызы кургаг чаңныктар өрттерниң өөскүүрүнге чылдагаан болганын дыңнаткан.
Бо хүнде 153 кижи база 19 санныг техника өрттерни өжүрүп турар. Регионалдыг ХК база ОБ албанының база Тыва Республиканың күрүнениң аңныыр комитединиң база Тываның девискээринде онза хайгааралдыг бойдус девискээрлериниң дирекциязының хууда составының күштерин болгаш дериг-херекселдерин немей хаара тудар. ТР-ниң Арга-арыг яамызының курлавырында 106 кижи база 113 санныг техника белен.
Чөөн-Хемчик биле Тес-Хем кожууннар девискээринде байдалдарны көрүп, муниципалдыг онза байдал чурумун чарлаан.
Июльдуң 25-тен август 14-ке чедир республика девискээринде өртке удур онза чурум үезинде арга-арыгже кижилерниң болгаш транспорт аймааның кирерин кызыгаарлап, арга-арыгга одаг кыпсырын, өрт-сиген өрттедирин шуут хораан.
Күрүнениң арга-арыг инспекторлары өрт сезону эгелээнден 1906 хайгааралдыг үнүүшкүннерни кылып, “Арга-арыгга өрт айыылының чурумнарын үрээни” деп чүүл-биле административтиг чурум үрээниниң дугайында 25 протоколду долдуруп, буруулуг кижилерни тодарадыры-биле, ТР-ниң иштики херектер органнарынче, РФ-тиң ОБЯ ТР-де КЭ-же 113 билдириишкинни киирген, амгы үеде хыналдалар чоруп турар.
2025 чылдың өрт айыылының сезону эгелээнден Тывага 11273,66 гектар ниити шөлге 114 арга-арыг өрттери бүрүткеттинген. Оларның 113-ү арга-арыг фондузунуң черлеринге, а 1-зи онза камгалалдыг бойдус девискээриниң 2 га черинге («Азас» күрүнениң бойдус заповеднигинге) болган.
А. МОНГУШ.
Чурукту ТР-ниң Чазааның парлалга албанындан алган.
“Шын” №29 2025 чылдың июль 31