«Өөредилге» национал төлевилел күүселдези-биле Тывада ам база ийи кванториум ажыттынган. Кызыл хоорайның 2 биле 8 дугаарлыг школаларында амгы үениң өөредилге технопарктары ажылын эгелээн. Оолдар, уруглар чамдык школа эртемнерин ханыладыр өөренип, эртем-шинчилелдерин чорудуп, инженер-техниктиг угланыышкында бодунуң билиглерин сайзырадып болур апарган.
Школа технопарктары химия, физика, биология кичээлдеринге ажыглаар амгы үениң чурагайлыг лабораториялары-биле чепсегленип, дыштанылга булуңнарын дерээн. Бо хүнде республикада беш кванториум бар, школалар чоогунда чурттап турар уруглар немелде кичээлдерже бижиткеш, барып болур.
Тываның Өөредилге яамызының медеглээни болза, школа технопарктарында 8 муң хире өөреникчи барып турар. Оон аңгыда, республика технопарыгы, ол ышкаш мобильдиг кванториум регионнуң ыраккы суурларынче үнүүшкүннерни организастаан.
«Бистиң Президентивис Владимир Владимирович Путин технологтуг хамаарышпас чорукту хөгжүдериниң өзек даалгаларын салган» – деп, республиканың Баштыңы Владислав Ховалыг кванториумнар ажыдыышкынын дыңнадып тура, бодунуң блогунда демдеглээн.
«Өөредилге» национал төлевилел өөредилгениң шынарын бедидер дээш бедик технологияларны ажыглалче киирип, оолдар, уругларга келир үеде мергежилин шилип алырынга дузалыг чаа аргаларны берип турар деп, республика Баштыңы чугаалаан.
Регионнуң Баштыңы Тывада өөредилге системазын модернизастаар ажылдар идепкейлиг чоруп турарын сагындырган. Чүгле эрткен ийи чылда көдээ черлерде 40 школаны бүрүнү-биле чаарткан, ам 6 школада капитал септелге чоруп турар. Чаа 7 өөредилге объектилерин тудуп турар. Дөрт школаны бо чылын ажыткан.
Бистиң корр.
Чурукту интернеттен хоолгалаан.
“Шын” №71 2024 чылдың сентябрь 18
Кванториум ажыттынган
18 сентября 2024
16