Тываныӊ Баштыӊы Владислав Ховалыг Кыдаттыӊ «Цзыцзинь» деп корпорациязыныӊ удуртулгазы-биле ужуражып, келир үеде кады ажылдаарын дугуржуп алган.
«Лунсин» амгы үеде бистиӊ кол инвесторувус болуп турар. Ол «Цзыцзинь» корпорацияныӊ «уруу» болур. Регионнуӊ эрге-ажыын кол кичээнгейге албышаан, бүдүрүкчүлүг ажыл-агыйжы харылзааларны тургузуп тур бис. Кыдат корпорация-биле кады ажылдажылга үезинде чедип алган арга-дуржулгавысты, амгы бо үеде болза, инвестициялыг политиканы сайзырадырынга болгаш республикаже чаа инвесторларны хаара тударынга ажыглап турар бис.
Тываныӊ бүдүрүлгелеринге «Цзыцзинь» деп корпорация чогуур үезинде хөй акшаларны киирген. 2008–2010 чылдарда болуп турган кризис безин ажылды ара соксадырынга чедирбээн болгай. Бөгүнде даг-байлакшыдар комбинатка 25,5 млрд рубль инвестицияны киирген. «Лунсинде» бистиӊ сес чүс ажыг чаӊгыс чер чурттугларывыс ажылдап турар.
Россияныӊ даштыкы экономиктиг харылзааларны Чөөн чүкче, ылаӊгыя Кыдатче, углап турары болза, Тыва биле «Цзыцзинь» деп корпорацияныӊ аразында харылзааларны сайзырадырынга чаа аргаларны тургузуп берген.
Бөгүн төлевилелдерниӊ тодаргай түӊнелдерин болгаш хуусааларны ылавылап, келир үеде кады ажылдажылганыӊ кызыгаарларын демдеглеп алдывыс. Республиканыӊ девискээринде ажылдап турар корпорация чоннуӊ социал амыдыралынга ажыктыг чүүлдерже кол кичээнгей салыр, регионнуӊ эрге-ажыктарынга когарал чедирбес, кады ажылдажылганы амгы үеде ышкаш ол хевээр чорудар ужурлуг дээрзин кыдат талага айтып чугааладым» — деп, регионнуӊ удуртукчузу Владислав Ховалыг социал четкиде блогунга бижээн.
Р. ДЕМЧИК.
Ада ТЮЛЮШТУҢ тырттырган чуруу.
«Шын» №87 2023 чылдың ноябрь 15