Школа доозуп турарларга кандыг мергежилди шилип алыры болгаш амыдыралдың узун, делгем оруунче кым болурунуң эге чадазының кол айтырыы тургустунуп кээрин билир бис. “Мергежил шилип алырынга кым дузалап болурул?” деп айтырыг хүннүң чугула айтырыгларының бирээзи дээрзин билзе чогуур. Маңаа кандыг-даа мергежилдиң уг-шиин тодаргай тайылбырлаар белеткел ажылы кончуг чугула дээрзин айтып каайн.
2025 чылдың апрель айда Тываның күрүне университединиң тудуг болгаш коммунал ажыл-агый кафедразының бөлүк башкылары Кызылдың 17 дугаар ортумак школазынга доозукчу класстың өөреникчилери-биле солун ужуражылганы эрттирген.
Келген аалчыларның аразында техниктиг эртемнерниң кандидады, кафедраның доцентизи Анай-Хаак Калдар-оол, кафедраның улуг башкылары Зита Оолакай база Дмитрий Сат аалдап келгеннер. Олар “Келир үеже билет” төлевилелинге үндезилээн “Мээң Рос- сиям – чаа девискээрлери” профориентация кичээлиниң темазы “Мээң мергежилим – тудугжу” деп ажыктыг кичээл-ужуражылганы эрттиргеннер.
Ук хемчегниң кол сорулгазы — доозукчуга тудугжунуң мергежилин таныштырып, ооң онзагай талаларын болгаш кандыг эртемнерге белеткелдиг болурун бүрүнү-биле тайылбырлаары.
Ужуражылга үезинде бистиң амгы ниитилеливиске бакалавриат, магистратурага инженер мергежилдиң янзы-бүрү угланыышкынныг ужур-утказын болгаш хереглелинге тайылбыр ажылын чорудуп, сайгарылганы кылган. Тываның улуг өөредилге чери болур ТывКУ-да инженер-техниктиг факультеттиң дугайында доозукчулар кичээнгейлиг дыңнааннар. Өөреникчилер боттарының сонуургаан айтырыгларын салып, идепкейлиг чоруун көргүскеннер. Мындыг ужуражылгалар янзы-бүрү эртемнерниң ужур-утказын сайгарып билиринге болгаш аныяк кижиниң мергежил шилип алырынга улуг рольду ойнап турар дээрзин айтып каайн.
Раиса ОНДАР, РФ-тиң улус өөредилгезиниң тергиини, ТР-ниң алдарлыг болгаш улустуң башкызы, РФ-тиң журналистер болгаш ТР-ниң чогаалчылар эвилелдериниң кежигүнү.
Авторнуң тырттырган чуруктары.
“Шын” №22 2025 чылдың июнь 12