Эрткен хүннерде Тываның күрүнениң ойнаар-кыстар театрынга “Театр – это мы” деп V республика чергелиг уругларның театржыткан чогаадыкчы фестиваль-мөөрейи болуп эрткен. Ону ТР-ниң Культура болгаш Өөредилге яамыларының деткимчези-биле эрттирген. Кол организакчылары Тываның күрүнениң ойнаар-кыстар театры биле Республиканың немелде өөредилге төвү болган.
Фестиваль республиканың аңгы-аңгы булуңнарындан келген театр уран чүүлүнге сонуургалдыг уругларны каттыштырып турары өөрүнчүг. Бо чылын фестиваль-мөөрейге Кызыл хоорайдан болгаш беш кожуундан 100 ажыг бичии артистерни хаара туткан 6 коллектив дараазында шиилерни көргүскен:
«Даш-Чүрек», «Өскүс-оол» (Ак-Довурак хоорай), «Сөөлгү тулчуушкун» (Кызылдың 12 дугаар школазының театр студиязы), «Зайка-Зазнайка» (Кызыл кожуун), «Буянныг араатаннар» (Мөңгүн-Тайганың Кызыл-Хаяда уругларның уран чүүл школазы), «Дары волхвов» (Таңдының Балгазындан), «Приключения пингвиненка Лоло» (Чеди-Хөлдүң Хову-Аксы школазының «Артхаус» театр студиязы).
Бичии артистерниң чаптанчыг оюн-көргүзүүн дараазында жюри үнелеп көрген:
Светлана Мунзук (Тываның В.Көк-оол аттыг Национал хөгжүм-шии театрының архив чыыкчызы), Чодураа Донгак (ТР-ниң Өөредилге яамызында немелде өөредилге болгаш кижизидилге айтырыгларының талазы-биле килдистиң консультантызы), Айдыс Чадамба (Тываның күрүнениң ойнаар-кыстар театрының уран чүүл удуртукчузу), Алина Монгуш (Республиканың немелде өөредилге төвүнүң директорунуң оралакчызы), Виктория Монгуш (Тываның күрүнениң ойнаар-кыстар театрының литература-чогаал килдизиниң удуртукчузу).
Жюриниң шиитпирлээни ёзугаар дараазында тиилекчилерни үндүрген:
I-ги чаданың лауреады – Таңды кожууннуң Балгазын школазы;
II-ги чаданың лауреады – Чеди-Хөл кожууннуң Хову-Аксының школазы;
III-кү чаданың лауреады – Мөңгүн-Тайга кожууннуң Кызыл-Хаяда уругларның уран чүүл школазы болган.
“Тулган кыс роль” деп номинацияга Ак-Довурак хоорайда “Өлчей” лицейниң сургуулу Дамырак Шырып кырган-ава ролюн күүсеткеш, тиилекчи болган.
“Тулган эр роль” деп номинацияга Кызыл кожууннуң “Эврика” немелде өөредилге төвүнүң шиизинде бөрүнүң ролюн ойнаан Дидим-оол Даржай төлептиг болган.
“Тергиин башкылаашкын ажылы” деп номинацияга Кызылдың 12 дугаар школазының башкызы Роланда Маадыр-оол тиилекчи болган.
Фестивальдың тиилекчилери дипломнар, акша шаңналдары болгаш өртектиг белектерден аңгыда, “Океан” Бүгү-россияның уруглар төвүнге дыштаныр сертификаттарны алган.
Чылдан чылче школачылар аразында театр уран чүүлү улам-на нептереңгей болуп, бичии артистерниң шииде рольдарны ойнаары улуг улустан дудак чок апар чыдарын фестивальдың организакчылары болгаш жюри кежигүннери демдеглээн.
Медээни болгаш чуруктарны Тываның күрүнениң ойнаар-кыстар театрындан алган.
“Шын” №85 2024 чылдың ноябрь 6