Тыва Республиканың Чазааның Даргазының оралакчызы – одаар чүүл болгаш энергетика сайыдының албан-хүлээлгезин күүседип турар Мерген Дагба келир кышка белеткел дугайында массалыг информация чепсектериниң ажылдакчыларынга дыңнаткан.
Көдээ суурларның чурттакчылары хөмүр-дашты республиканың Чазааның доктааткан өртээ-биле деңзилеп садып алыр байдалды тургузар дээш, кожууннар төптеринде одаар чүүл складтарын дериири уламчылап турарын ол чугаалаан. Таңды, Тес-Хем, Эрзин, Бай-Тайга, Барыын-Хемчик, Мөңгүн-Тайга, Өвүр кожууннарда бо ажыл дооступ турар. Складтарда эрги деңзилерни чаартып септээн, дөрт складка амгы үениң чаа деңзилерин тургузар ажыл чоруп турар. Ону сентябрь ортаа үезинде дооскаш, хөмүр-дашты сөөртүп эгелээр.
Кожууннар төптеринде одаар чүүл складтарынга хөмүрнү Каа-Хем болгаш Чадаана уургайларындан үзүктел чок сөөртүрү-биле КамАЗ К2030 марканың 12 аар чүък машиналарын, складтардан хөмүр-дашты чүдүрер техника аймаан садып алган. Оларга немей чаа машина-техниканы садып алырын планнаан. Одаар чүүл складтарынга видеохайгаарал дериг-херекселин, хөмүр-даш сөөртүр автомашиналарга GPS-навигаторларны тургузар. Ындыг дериг-херексел хөмүр-дашты складтарга сөөртүп чедиреринге болгаш чүдүрүп садарынга шыңгыы хыналда болур.
Тыва даг-руда компаниязының парлалга албанының дыңнадыы-биле алырга, чаа одалга сезонунуң үезинде техниканы үрелиишкин чок ажылдаарының белеткели, хууда кижилерге хөмүр-даш чүдүрүп садар шөлдү дериири ам-даа уламчылавышаан. Ол ажылды август айның төнчүзүнде доозар. Ынчангаш хууда кижилерге хөмүр-дашты чүдүрүп садарын түр када соксаткан.
Юридиктиг эрге-байдалдыг кижилерге болгаш албан-организацияларга хөмүр-дашты чайгы үеде понедельник – суббота хүннеринде эртенгиниң 8.00 шактан кежээкиниң 19.00 шакка чедир чүдүрүп чорудуп турар.
“Шынның” корр.
Чурукту интернеттен алган.