Тываның арга-арыг камгалаар төвү ноябрь төнчүзүнде “Кышкы арга” деп фото-чуруктар мөөрейин чарлаан. Ук мөөрейниң кол сорулгалары – өзүп олурар салгалдың экологтуг бот-медерелин сайзырадыр, долгандыр турар бойдуска хумагалыг болурун, бичии чаштарның арга-арыгга ынакшылын хандыкшыдып, объектив таварыштыр төрээн чериниң кайгамчык чараш черлерин шинчилээри болуп турар.
Ниитизи-биле республиканың шупту булуңнарындан 100 аңгы фото-чуруктарны мөөрейже чоруткан. Ажыл бүрүзү-ле бот-тускайлаң болгаш онзагай. 107 чуруктуң ачызы-биле бүгү Тывага аян-чорук кылган-биле дөмей деп, жюри кежигүннери магадааннар.
Чуруктуң бодундан аңгыда, киржикчилер тырттырган чериниң чурумалдыг чаражын онзагайлавышаан, албан кайда турарын айтыр ужурлуг. Ынча хөй кайгамчык ажылдарның аразындан тиилекчини илередири нарын айтырыг.
Түңнелинде, 7-12 назы-харлыг уругларның бөлүүнге – Кызылдың 17 дугаар школазының өөреникчизи, 9 харлыг Камила Моңгуш шылгарап үнген. Ийиги черге Кызылдың 5 дугаар гимназиязының өөреникчизи Айгуль Сат төлептиг болган. Шагаан-Арыгдан Яна Федоскина 3-кү черни алган.
13-17 харлыг бөлүктүң тиилекчизи – Улуг-Хемниң Торгалыгдан Айда-Сай Доржу. Кызылдың 5 дугаар гимназиязының өөреникчизи Дияна Сат ийиги черни чаалап алган. Улуг-Хемден Сайури Саая 3-кү черниң белээнге төлептиг болган.
Жюри кежигүннериниң чаңгыс үн-биле хүлээп алган шиитпири – Сүт-Хөл кожууннуң Кызыл-Тайга сумузундан кадыы кызыгаарлыг 12 харлыг Цэнт-Аюш Кууларга “Көрүкчүлерниң сонуургалы” деп тускай шаңналды тывыскан. Экологтуг культураны суртаалдап турар идепкейжи башкыларга хүндүлел бижиктерин сөңнээн.
Бистиң корр.