Тыва Республиканың орук албан черлери кыш дүшкени-биле ажылдың күштелдирген чурумунче шилчээн. Кожууннарда чагган баштайгы өл хар оруктарны дошталдырып, орук шимчээшкининиң киржикчилеринден онза кичээнгейни негей берген.
Республиканың орук бүдүрүлгелери харны арыглаар дээш, хүннүң-не ажылдап турар. 35 тускай орук техниказы болгаш орук ажылдакчылары орук ашталгазында хаара туттунган. Тываның Орук-транспорт яамызының дыңнатканы болза, амгы үеде 15 орук организациязының 6-зы оруктарда идепкейлиг ажылдап турар.
Республиканың орук албаннары агаар-бойдустуң байдалын көрүп тургаш, республика девискээринге база оон дашкаар, ылаңгыя дүнеки үеде чоруурундан ойталаарын чурттакчы чонга сүмелеп турар. Сайыт орук шимчээшкининиң дүрүмнерин болгаш айыыл чок чоруктуң хемчеглерин сагыырын чолаачыларга сагындырган: агаар-бойдустуң байдалын көрүп, оожум чоруп, куржанып алырын утпас.
Агаар-бойдустуң байдалын көрүп, бодунуң айыыл чок чоруу дээш сагыш човаары чугула дээрзин Тываның Транспорт яамызы сагындырган. Чолаачылар чайгы дугуйларын кышкы дугуйларже солуур, а чадаг кижилер оваарымчалыг болур, чадаг кижи эртер орук чок черден кешпес, айыыл чок чорукту сагыыр. Орук кежип тургаш, чырып турар камгалалдарны ажыглаар, телефон-биле чугаалажырын соксадып, кулаанда наушнигин уштуп алыр.
Тываавтооруктуң дыңнадып турары болза, республика оруктарының шупту участоктарында байдал таарымчалыг, Суг-Аксы – Баян-Тала автооруунда чирилген черлер бар болганындан аңаа чорууру таарымча чок. Ындыг-даа болза ону ояр орук бар, машиналар эртип болур.
Бистиң корр.
“Шын” №92 2024 чылдың ноябрь 30