Кырында хар чаггаш, эривээн Тываның тайга-сыннарындан эртен-кежээ сырын соолаңнадыр хап турары — кыш дүжүп кел чоруурунуң им-демдээ. Шынааларга агаарның температуразы эртен-кежээ чылыы 1–2 градус, а тайга-таскыл бедик черлерге соок апарган. Ылаңгыя чолаачыларга ол шыңгыы кичээндириг — чайгы дугуйларны кышкы дугуйларга солуурун сагындырып турар.
Агаарның чылыы хүндүс 7 градус турда, дүне хыраалыг шалың дүжүп, оруктарга тайгыр апаар. Техниктиг негелделер ёзугаар агаар-бойдустуң ындыг байдалынга машинаның чайгы дугуйларын кышкы дугуйларга чолаачылар солуур ужурлуг. Чүге дээрге агаарның ол хире температуразынга дугуйларның чайгы резиназы кадыг апарып, оруктарга тайып болур.
Амгы үеде Тываның бедик черлеринде оруктарда агаар дүне соок апарган. Эң ылаңгыя Кызыл – Абакан, Кызыл – Мөңгүн-Тайга, Кызыл – Тес-Хем – Эрзин оруктарынга аргыжып турар чолаачыларга машиналарының чайгы дугуйларын кышкы дугуйларга солуурун Күрүнениң автоинспекция ажылдакчылары шыңгыызы-биле сүмелеп турар.
Чайгы дугуйларны кышкы дугуйларга солуваан чолаачыларны оруктарга Күрүнениң автоинспекция ажылдакчылары доскаш, 500 рубль акшага торгап болур. Ындыг эргени оларга Россия Федерациязының Чазааның 2023 чылдың декабрь 1-де үндүрген доктаалы берген. Ол доктаал 2023 чылдың сентябрь 1-де күштүг апарган.
/ Бистиң корр.
«Шын» №72 2024 чылдың сентябрь 21