Хенертен сооктар дыңзып кээрге, бажыңнарга өрттер болур айыыл улгаткан. Дыңзыг соокта кижилер суугузун күштүг одап, чылыдар херекселдерни ажыглап эгелээн. Үр үе дургузунда ажылдатканындан электрилиг херексел изээш, өрттени берип болур. Айыыл чок чоруктуң негелделерин сагыырын специалистер сүмелеп турар.
Соок үе дүжерге, чурттакчылыг черлерде өрттерниң саны көвүдей бээрин сан-чурагайлар көргүскен. Бажыңнарын чылыдар дээш, кижилер электрилиг болгаш өске-даа херекселдерни ажыглап турар. Колдуунда печказын одааш, хайгаарал чокка арттырып турарындан хөй өрттер болуп турар.
“Республиканың чамдык черлеринде температура -50 градус чедир бадып турары-биле, өрттер болгаш орук озал-ондактарының айыылы улгаткан. Сөөлгү неделя дургузунда печказынга от салырда, өртке удур айыыл чок чоруктуң дүрүмнерин хажытканы-биле, 20 чуртталга бажыңнарынга өрттер бүрүткеттинген” — деп, РФ-тиң Онза байдалдар яамызының Тывада эргелелиниң начальнигиниң оралакчызы Валерий Шыырап дыңнаткан.
Одалга сезонунда өрттерниң бир кол чылдагааны– суугуну одаарда, өртке удур айыыл чок чоруктуң дүрүмнерин хажытканы. Өрттер колдуунда күштүг одаанындан, шала кырынче изиг хүл төгүлгенинден база өрттениичел материалдарны печканың чоогунга салып каанындан болуп турар. Оон аңгыда печканың ыш үнер оруун удаа-дараа аштап, чыылган хөөзүн доктаамал арыглаары чугула.
“Россияның Онза байдалдар яамызының Тывада Төп эргелели хамаатыларны печкаларының байдалын хынап, үрели берген электри херекселдерин ажыглавазын кыйгырып турар. Болдунар-ла болза, ырак черлерже чоруурун шеглээрин, ылаңгыя караңгы үеде чорук чорбазын сүмелеп тур бис” – деп, РФ-тиң Онза байдалдар яамызының Тывада эргелелиниң начальнигиниң оралакчызы Валерий Шыырап чугаалаан.
Регионалдыг болгаш федералдыг оруктарга айыыл чок чорукту хандырары-биле чеди черде чылыгланыр станцияларны ажылдаткан. Ниитизи-биле чүс дөртен ажыг кижи хары угда чылыттынып ап болур аргалыг.
Бистиң корр.
Чурукту интернет четкизинден хоолгалаан.
“Шын №2 2025 чылдың январь 22