Тускай шериг операциязының зоназынче кышкы гуманитарлыг дуза чыылдазында 10 мотоциклди чорудар. Тывада Улусчу фронтунуң регионалдыг салбырының күүскомунуң удуртукчузу Саима Далчин ооң дугайында дыңнаткан. Фронтуда шериг албанныглар мотоциклдерни база дилээн. Республиканың муниципалдыг тургузуглары ону боттарында хүлээнип алган.
«Мототехника база автотранспорт аймаа дыка херек. Спортчу даг мотоциклдери орук чок черлерге тура дүшпес хөлге ол. Ооң-биле балыгланган оолдарны дажыглап, турушту дүрген солуурунга дузалажып, ок-боону, суксунну дээш өске-даа чүүлдерни чедирери эптиг» — деп, Саима Далчин чугаалаан.
Бо хүннерде муниципалитеттерде гуманитарлыг дузаламчы чыыр тус чер пунктуларында ажыл кидин түлүк. Тываның чурттакчылыг суурларында организациялар болгаш ажылчын коллективтер аал-чуртундан ыракта дайынчы хүлээлгелерин күүседип чоруур чаңгыс чер чурттугларын деткиир буянныг херекте үлүүн киириштирген. Олар техниктиг дериг-херекселдерни, генераторларны, чылыг үрдүрер херекселдерни чыгган. Чон чылыг хеп аймаан, эм-таңны, газ-биле ажылдаар суугуларны, чылыдыкчыларны дээш, өске-даа чугула херек чүүлдерни чыылда пунктуларында хүлээдип турар. Кожууннарда белеткээн чүъктү тускай график-биле ноябрь 26-дан эгелеп республика төвүнче сөөртүп, хүлээдир.
Республиканың 1 дугаар эмнелгези шериглерниң хереглелинге дээш доктар билбес УАЗ биле ГАЗель – ийи автомобильди чорударынга белеткээн. Ол ийи машинаны ыяк септеп, кышкы дугуйларны кедирип, хөделдирер база чаар-тудар кезектерин чаартып солаанын эмнелгениң удуртулгазы дыңнаткан. «Бо машиналарны корпустар аразынга аарыг кижилер сөөртүрүнге ажыглап турган. Ам тускай операция зоназында бистиң дайынчыларывыска бараан болур үези чедип келгени ол» — деп, кол эмчиниң оралакчызы Болат Ховалыг тайылбырлаан.
Республика эмнелгезинден аңгыда, өске черлер база гуманитарлыг дузаламчыларын дамчыткан. Чижээ, туберкулезка удур диспансер элээн каш берцылар болгаш бүрүн чүмнеттинген эмчи барбаларын хүлээткен. Наркология диспансери госпитальдарже орун-дөжек херекселдерин база аржыылдарны, «ЦСКА-Тыва» спорт школазы эмчи дериг-херекселдерин, "Восток" КХН техниктиг септелге материалдарын, дериг-херекселдерни база мотоциклди, волонтёр пунктулары чаштынар четкилерни дамчыткан.
Бо удаада чорудар чүък Чаа чыл бүдүүзүнде чеде бээри-биле онзагай. Ынчангаш оолдарже үш хире тонна доңурган эътти, тыва школачыларның чылыг-чымчак болгаш деткимчениң сөстерин илереткен өңгүр чараш открыткаларны чорудар.
Декабрьның 12–13 хүннеринде хөй тонна чүък чүдүрер улуг машина Кызылдан үнүптер. Неделя хире болгаш, Луганск Улус Республиканың Свердловск хоорайга чеде бээр.
Бистиң шериглеривиске дуза кадыксаан азы Чаа чылдың посылказын фронтуже чорудуксаан кижилер ону декабрь 10-га чедир эккеп хүлээдир арга бар. Кызылда Улусчу фронтунуң регионалдыг күүскомунуң дараазында адрезинде гуманитарлыг дузаны чыып турар: Тыва эки турачылар кудумчузу, бажың 3, телефон: 8(39422)2-10-50.
Гуманитарлыг дуза чыылдазының компаниязы «Шупту чүвени Тиилелгеге!» федералдыг төлевилел күүселдези-биле чоруп турарын сагындыраал.
Бистиң корр.
«Шын» №90 2024 чылдың ноябрь 23