Кышкы лагерьлерни организастаан

Чаңчыл ёзугаар Чаа чылдың байырлал хүннериниң дооступ турары-биле, уругларның кышкы хүндүскү лагерьлери база төнүп турар.

Тыва Республиканың Күш-ажыл болгаш социал политика яамызы 2025 чылдың январь 2-ден 8-ке чедир республиканың өг-бүлелерге болгаш уругларга социал дуза төптериниң баазазынга 15 лагерьни организастаан. Аңаа план ёзугаар 374 уруг дыштаныр турган болза, 371 кижи хостуг үезин ажыктыг эрттирген. Даштын агаар соок-даа болза, уруглар сонуургал-биле кээп дыштанып, хөй-ле чаа чүүлдерни билип алган.

Бадылаттынган хүн чурумун ёзугаар эртенниң-не уругларның болгаш ажылдакчыларның кадык байдалын эмчи хынап, сула-шимчээшкинни кылып, уругларның кадыкшылын экижидер, сагыш-сеткилин көдүрер, янзы-бүрү талазы-биле сайзырадыр, харыысалгалыг болгаш чурумнуг болурунга ажыктыг чаңчылдарны хевирлээр шугум чыскаалдарын эрттирип турган.
Уругларның сагыш-сеткилинге эки салдарлыг агаарлаашкыннарны болгаш экскурсияларны организастаан. Эрги байдалды өскертири, ажык девискээр, долгандыр каас-чараш чүүлдерниң хөйү уругларның дүвүрээзинин оожургадыр.

Кышкы дыштанылга үезинде байырланчыг сагыш-сеткилди уругларга социал дуза төптериниң ажылдакчылары сөңнээн. Оларга салбырларның эргелекчилери, кижизидикчилер, психологтар, поварлар, чолаачылар, техниктиг ажылдакчылар болгаш оон-даа өскелер хамааржыр.