КЫСКА МЕДЭЭЛЕР

Кызылдыӊ автовокзалы.

Кызыл хоорайныӊ автовокзалы – республикада кол транспорт инфраструктуразыныӊ объектизи. 2021 чылда ооӊ төлевилелин ажылдап кылыры-биле 4,0 млн рубльди республиканыӊ бюджединден үндүрген. Проект-смета документациязын 12 ай дургузунда тургузуп кылыр талазы-биле керээни Тудуг яамызы биле «Дорстройпроект» КХН чарып алган.
Автовокзал тудуунга 474,2 млн хире рубль херек болурун сметада айтып каан. Ону күрүне хуу эштежилге деп механизм-биле тудуп кылыр аргаларны Тываныӊ Тудуг, Экономика болгаш үлетпүр яамылары тып көөр ужурлуг.
Бир шакта 100 кижи кирип болур автовокзалдыӊ шөлү 698,9 дөрбелчин метр.

Оруктарны септээр

Кызыл хоорайныӊ, Каа-Хем биле Сукпак суурларныӊ чамдык кудумчуларында кезек черлер автобустар халдыр оруктарныӊ нормативтиг негелделеринге шуут дүүшпейн турар. Септээр оруктарлыг кудумчуларны тус-тузунда айтып каан.
Баш бурунгаар санаашкын-биле алырга, чүгле Каа-Хем хоорайжыттынган суурнуӊ безин Горная, Малчын, Геофизическая, Аныяк, Безымянная кудумчуларында орукту септээринге 4,24 млн рубль херек.
Сукпак суурнуӊ Фрегатная деп кудумчузунга чүгле сөөлгү доктаам пунктузун кылыр, а Каа-Хем суурга Звездочка, Лазурная, № 2 школа, Хемчик садыы, Серебрянка деп хары-угда беш доктаам пунктузун кылыр. Чаӊгыс доктаам пунктузун тургузарыныӊ өртээ 2,0 млн рубль болур.
Үстүнде айыттынган ажылдарныӊ акшаландырыышкынын Орук-транспорт яамызы, Кызыл кожууннуӊ чагыргазы 2023 чылдыӊ бюджединге киирерин шиитпирлээр.

Чоннуӊ саналы-биле транспорт планнаашкыны

Маршруттуг орук четкизиниӊ кол документилерин кылырда, улус-чонга херектиин барымдаалаар. Ынчангаш ол-бо девискээрниӊ чурттакчыларындан айтырып тургаш, транспорт планнаашкының документилерин кылып эгелээр.
Бо документилерни ажылдап кылыры безин 25,0 млн рубль болур. А оларны баш бурунгаар шын белеткеп алырга, «Айыыл чок болгаш шынарлыг оруктар» национал төлевилелдиӊ хемчеглеринге киржип болур.
2019–2022 чылда Тываныӊ Чазаа «Айыыл чок болгаш шынарлыг оруктар» национал төлевилелге киржири-биле чагыгларны киирип турган. Ынчалза-даа транспорт планнаашкыныныӊ документилери, пассажирлер аргыжылгазыныӊ таарыштыр доктааткан тарифтери чок болганы-биле киржикчилер санынче кирбейн барган.

«Хаван чадаг» болбазын дээш…

Күс дүжерге, пассажирлер көвүдей бээр. Ажылынче далашкан улуг кижилерге школачылар, студентилер каттыжып келир. Пассажирлер сөөртүп турар хуу сайгарлыкчыларныӊ транспорту улуг эвес дээрзи билдингир.
Чоокта чаа Сукпактыӊ, Серебрянка, Дар дачаларыныӊ, Кызылдыӊ Карбышев, Суворов кудумчуларыныӊ, МЖК болгаш аэропорт чоогунда чурттакчылар автобус чок «хаван чадаг» артып калган деп медээлер дыӊналып келген.
Хөй улустуӊ аай-дедир аргыжар дүшкүүрлүг үелеринде Орук-транспорт яамызыныӊ специалистери кезек маршруттарныӊ сөөлгү доктаамнарында рейдилерни чорудуп турар.

Р. ДЕМЧИК белеткээн.