Нефть продукциязының өртектер мониторингизиниң талазы-биле оперативтиг штабтың ээлчеглиг хуралы Тываның Чазааның Даргазының оралакчызы Эдуард Санданның удуртулгазы-биле болуп эрткен. Кывар-чаар чүүлдер рыногунда байдалды өйлээр талазы-биле күүсекчи эрге-чагырга органнарының чорудуп турар ажылын оперативтиг штабтың удуртулгазы неделя санында дүүштүрүп турар. Ол ышкаш «Роснефть» акционерлиг ниитилелдиң болгаш өске-даа хандырыкчы организацияларның нефть продукцияларын республикаже киир сөөртүрүнүң графигиниң күүселдезин база контрольдап турар.
Штабтың ажылынга Монополияга удур федералдыг албанның Тыва Республика талазы-биле эргелелиниң, ТР-ниң Тарифтер талазы-биле албанының, ТР-ниң Одаар чүүл болгаш энергетика база ТР-ниң Көдээ ажыл-агый болгаш аъш-чем яамыларының, ТР-ниң Орук-транспорт комплекизиниң удуртукчулары, ол ышкаш муниципалдыг тургузугларның чагырга даргалары киржип турар.
Кывар-чаар чүүлдүң ортумак өртээниң өзериниң регионда деңнелин 2026 чылдың май айдан тура хайгаарап келген. Ол ажыл уламчылап турар. Амгы үеде байдалды анализтеп көөрге, бензинниң өзүп турар чылдагааны – нефть продукциязының биржазында кывар-чаар чүүлдү мөөңү-биле садар өртээниң өскени. База бир чылдагаан — республиканың девискээринде нефть продукциязын сайгарып турар хуу сайгарлыкчылар мөөңнеп садар сайгарлыкчылар-биле узун хуусаалыг керээлерни чарып албааны.
Монополияга удур федералдыг албанның Тыва Республика талазы-биле эргелели кывар-чаар чүүлдер өртектерин өстүреринге сүлчээлиг дугуржуушкуннар бар болуп болурун хынаар ажылдарны чорудуп турар.
Кывар-чаар чүүлдер өртээ өзерге, пассажирлер аргыштырар автобустарның кожууннар аразында маршруттарының ажылдаар расписаниезинге кандыг салдарлыын республиканың Орук-транспорт комплекизиниң яамызы Кызыл хоорай мэриязы-биле кады сайгарып турар.
Ол ышкаш социал объектилерни кывар-чаар чүүл-биле мурнады хандырар механизмни ажылдап кылып турар.
Кывар-чаар чүүл эвээжеп база өртээ өзүп турар байдалда республиканың кожууннар болгаш хоорай чагыргаларының даргалары дагдынган девискээрлериниң социал-экономиктиг байдалының анализин хүннүң чорудуп турар.
Монополияга удур федералдыг албанның Тыва Республика талазы-биле эргелели регионнуң Одалга болгаш энергетика яамызы-биле кады республиканың девискээринде ажылдап турар 96 АЗС-те кывар-чаар чүүлдер өртектериниң мониторингизин чорудуп турар. Өртектер мониторингизиниң түңнелдерин монополияга удур федералдыг албанның Тыва Республика талазы-биле эргелелиниң сайтызында, ВКонтакте социал четкиде база МАХ мессенджерде салып турар.
2025 чылдың эгезинден чижилгелиг байдалды хандырар база үүрмектеп садар рынокта өртектерни доктаадыр сорулга-биле «Роснефть» компанияның ийи автозаправка станциязын (АЗС) Кызыл хоорайда ажыткан. Өске автозаправка станциялары-биле деңнээрге, «Роснефть» АЗС-тиң өртектери элээн чиик хевээр артпышаан дээрзин анализ көргүскен.
Тываның Одалга болгаш энергетика яамызының медээзи-биле, 2026 чылдың июль 2-ниң көргүзүү-биле алырга, республиканың девискээринде кывар-чаар чүүлдер эвээжээни демдеглеттинмээн.
/ Бистиң корр.
Чурукту интернеттен алган.
“Шын” №26 2026 чылдың июль 9
"Шын" солуннуң МАХ-каналынга каттыжыңар: max.ru/join/egenQ...