2026 чылдың май 15-те хоорай хевирлиг Каа-Хем суурнуң “Тиилелге” спортчу культура төвүнге кадыы кызыгаарлыг ажы-төл азырап турар өг-бүлелер аразынга “Кызыгаар чок делегей” деп чылдың-на болуп эртер республика чергелиг фестиваль болур.
Ол анаа-ла хемчег эвес, а кадыы кызыгаарлыг ажы-төл азырап турар өг-бүлелерге канчаар-даа аажок кайгамчык байырлал болур. Бо чылын ол ооң мурнундагызынга деңнээрге, элээн тускай хевирге эртер.
Аалчыларны бүгү-ле назы-харның кижилеринге дендии солун программа манап турар. Чогаадыкчы чорук кызыгаар чок дээрзин билир бис. Кижи бүрүзү бодунуң салым-чаяанын көргүзүп болур чуруктар болгаш уран чүүл мөөрейлери база бар. Сеткилиниң ханызындан чогаадып тургаш, хол-биле кылган ажылдарны делгелге-ярмаркага салып, садып-саарып болур. Эң-не чогаадыкчы салым-чаяанныг өг-бүлелерге видео-таныштырылга мөөрейин база чарлаан. Кадык амыдыралды суртаалдаары болгаш тудары амгы үеде нептереңгей апарган болганда, спартакиада база болуп эртер. Аңаа кол-ла чүве тиилелге эвес, а өг-бүлези-биле хей-аът көдүрлүүшкүннүг киржири.
Бо фестиваль Бүгү-делегейниң өг-бүле хүнүн болгаш Тургузукчу күш-ажылдың болгаш өг-бүлениң ыдыктарының чылын каттыштырган.
Тыва Республикада уругларның эрге-ажыын камгалаар бүрүн эргелиг төлээзи Саида Сеңгии бо кончуг чугула ажыл-херектиң киржикчизи болур күзелдиг кижи бүрүзүн фестивальче чалап турар. Найыралга, чогаадыкчы чорукка болгаш аас-кежиктиг болурунга кызыгаар чок ниитилелди кады демнежип тургузарынче кыйгырган.
Мөөрей дугайында айтырыглар бар болза, дараазында телефон дугаары-биле харылзажып болур: 8 (39422) 2-63-09
ТР-де Уругларның эрге-ажыын камгалаар төлээ чериниң медээзинден.
“Шын” №17 2026 чылдың май 7
"Шын" солуннуң МАХ-каналынга каттыжыңар max.ru/join/egenQ...