Декабрь 3-те “Сүбедей” спорткомплекизинге Бүгү-делегейниң инвалидтер хүнүнге тураскааткан республика чергелиг спартакиада болуп эрткен.
Кызыгаарлыг арга-шинектиг улусту мөөңнээн чылдың болур спартакиаданың байырлыг ажыдыышкынында ТР-ниң Күш-ажыл болгаш социал политика яамызының оралакчы сайыды Орланмай Куулар киришкеш, чыглып келген командаларга чедиишкиннерни болгаш быжыг кадыкшылды, дидим тура-сорукту күзээш, “Тыва Республиканың социал албанының 80 чылы” медаль-биле дараазында шылгарааннарны шаңнаан:
- Инвалид уругларның эрге-ажыын камгалаар болгаш оларны деткиири-биле эрткилээн хөй-ниитижи ажыл-чорудулгага киирген үлүг-хуузу дээш “Бүгү-россияның инвалидтер ниитилели” хөй-ниити организациязының Тывада регионалдыг салбырының даргазы Айлаңмаа Монгушка;
- Кызыл хоорайның инвалидтер организациязының даргазы Эмма Шыырапка;
- Бии-Хем кожууннуң Инвалидтер эвилелиниң даргазы Чечена Тожуга;
- “Бүгү-россияның инвалидтер ниитилели” хөй-ниити организацияның Тывада салбырының кежигүннери Айрат Ховалыг, Елизавета Монгушка тывыскан.
Спартакиаданың байырлыг ажыдыышкынының соонда янзы-бүрү спортчу хемчеглер болгулаан. Маргылдаа киржикчилериниң аразында эң улуг назылыг – 79 харлыг Мария Боргоякова шашки маргылдаазынга киришкен. Ооң чымчак хүлүмзүрүү маргылдаа киржикчилеринге онза сорунзалыг болуп, эки чүүлче бурунгаар тура дүшпес чүткүлдүг болурунга идиг болуп турганын киржикчилер эскерген.
Чылдың болур спартакиада кадыының байдалы-биле кызыгаарлыг арга-шинектиг улуска ёзулуг спортчу байырлал болуп эрткен.
Түңнелинде чиик атлетикага херээжен улус аразынга 60 метрге коляскалыг чарышка Алдасай Монгуш тиилекчи болган. Эр улус аразынга Руслан Очур тиилээн. 100 метрге чадаг чарышка ТШО киржикчизи Кайгал Ондар тиилээн.
Дартска херээжен улус аразынга – Алёна Догус-оол, эр улус аразынга Анатолий Сарыг-оол тиилекчилер болган. Стол теннизинге: эр улус аразынга – Начын Ооржак, херээжен улус аразынга Алёна Догус-оол тиилээн. Ол-ла маргылдаага коляскалыг улус аразынга херээжен спортчулардан – Урана Күжүгет, эр улус аразынга Александр Бюрбю тиилээннер. Шашки маргылдаазынга Чодураа Аран, шыдыраага Сылдыс Балчый шылгарап үнгеннер. Армрестлинг маргылдаазынга Чинчи Куулар, Адыгжы Чамзырын, Сайын Кашпык-оол, Кармелла Монгуш, Леонид Ховалыг аңгы-аңгы бөлүктерге тус-тузунда тиилекчилер болган.
Онза кичээнгейни карааның көөрү кошкак улусче углап, оларга маргылдааларга киржир таарымчалыг байдалдарны база тургускан.
Карааның көөрү кошкак улус аразынга маргылдааларны аңгылап эрттиргени солун болган. Стол теннизинге херээжен улус аразынга – Сай-суу Иргит, эр улус аразынга Александр Салчак тиилекчи болган. Армрестлинг маргылдаазынга эр улус аразынга – Станислав Ооржак, херээжен улус аразынга Елена Хомушку тиилекчилер болган. Шашки маргылдаазынга Полина Дондуп бүзүрелдии-биле бирги черни чаалап алган.
Маргылдааларның шупту тиилекчилери медальдар болгаш грамоталар-биле шаңнатканнар.
Сорунза МОНГУШ.
Чуруктарны болгаш медээни ТР-ниң Күш-ажыл болгаш социал политика яамызының социал четкизинден алган.
“Шын” №48 2025 чылдың декабрь 11