20 ажыг чыл болганда РФ-тиң Кызыл дептериниң чаа томун 2024 чылдың декабрь 18-те парлап үндүрген. “Үнүштер болгаш мөөгүлер” деп томче 741 ховар үнүштер болгаш мөөгүлер дугайында медээни киирген.
Ооң мурнунда Кызыл дептерже кирип турган үнүштерни шинчилеп көргениниң түңнелинде, 102 хевирниң объектизин амгы үеде чидип бар чыдар үнүштер аразынче кирбейн турарын барымдаалааш, дептерден ап каапкан. Ооң орнунга 167 ёзулуг чидип бар чыдар черлик үнүштерни немээн.
Чаа үнген томну тургусчурунга чурттуң бүгү регионнарында эртем-шинчилел институттары болгаш дээди өөредилге черлеринден, онза камгалалдыг черлерниң эртемденнери 200 автор киришкен. 741 объектиниң дугайында медээ бүрүзүнге өңнүг чуруктарны немээни-биле дептер онзагай болуп турар. 2025 чылда Кызыл дептерниң интернет-порталын ам-на ажыдар дээн.
Эң баштайгы ССРЭ-ниң Кызыл дептери 1978 чылда парлаттынганын сагындыраал. Ынаар чидип бар чыдар 443 үнүш, чер-суг амытаннары – 8, соястаарлар – 21, 63 аңгы куш хевирлери, 62 сүт чемиштиг амытан кирген. Ооң соонда 860 арынныг, өңнүг чуруктарлыг Кызыл дептерни 2001 чылда чаарткан.
Медээни интернеттен алган.
“Шын” №2 2025 чылдың январь 23