Кызыл диплом-биле дооскан

Студент тургаш-ла бодунуң бойдустан чараш үнү-биле хөйнү кайгаткан опера ыраажызы чаңгыс чер чурттуувус Карина Ховалыг Москваның П.И. Чайковский аттыг консерваториязын кызыл диплом-биле бо чылын дооскан.

Карина Ховалыг Кызылдың А.Б. Чыргал-оол аттыг уран чүүл колледжизин 2020 чылда дооскаш, улаштыр Москваның П.И. Чайковский аттыг консерваториязынче өөренип киргеш, бо чылын чайынналчак чедиишкинниг ону дооскан. Ооң вокал талазы-биле удуртукчузу, хөйге билдингир башкы Е.И. Скусниченко доостурган.
Ол чүгле Москваның консерваториязының доозукчузу эвес, Улуг театрның төөгүзүнче ады кирген ыраажы болуп турар. Карина Ховалыгның аныяктарның опера программазынга киришкени безин классиктиг хөгжүм делегейинде ооң киржилгези улуг дээрзиниң бадыткалы. Ооң ады российжи болгаш делегей чергелиг улуг конкурстарга тиилелгелери-биле алдаржы бергени, Тываның чонунга чоргаарал болуп турар. Хөй мөөрейлер аразындан “Италияга орус кежээлер” деп Бүгү-делегейниң фестиваль-конкурска шаңнал алганы, 2025 чылда Бүгү-делегей чергелиг конкурска Хибла Герзмаваның дипломун алганы онзагай черни ээлеп турар.
Тыва чурттуг ыраажы кыстың үнү делегей чергелиг чаңгыланып, хөйге билдингир апарганы республиканың культуразының төөгүзүнде база бир көскү болуушкун. Москваның П.И. Чайковский аттыг консерваториязын кызыл диплом-биле дооскан Тывадан ыраажы – амдыызында чаңгыс Карина Ховалыг.
Студент тургаш-ла К. Ховалыг Россияның улуг концерт залдарын долдуруп, классиктиг хөгжүм ырларындан аңгыда, чаа үениң эстрада ырлары-биле бодунуң концерттерин көргүзүп турары — улуг чедиишкин.
Бо чылын ол “Русский мир” фонд биле Россияның Даштыкы чурттар херектериниң яамызының эгелээни «Восходящие звёзды» төлевилелге киришкен. Апрель 21-ден 30-ге чедир Дели, Мумбаи болгаш Тривандрум хоорайларга өске аныяк хөгжүмчүлер-биле концерттерни көргүскен. Ол ышкаш шак ындыг Улуг Тиилелгениң 80 чыл оюнга тураскааткан концерттерни Бангладештиң найысыла- лы
– Дакка, Куала-Лумпурга эрттирген. Чаа төлевилелге киржилгези-биле ол даштыкы чурттарга орус культураны төлээлеп, бодунуң карьеразынга чугула чаданы эрткен.
Бистиң корр.
ТР-ниң Культура яамызының медээзи болгаш чуруктары
“Шын” №25 2025 чылдың июль 3