Тыва Республиканың культура болгаш дыштанылга национал парыгынга «Работа России. Время возможностей» деп бүгү-россия чергелиг ажылчын олуттар ярмарказының федералдыг чадазы болуп эрткен.
Бо ярмаркага Тыва Республика үш дугаар чыл киржип турар. Кол сорулгазы – ажыл дилеп турар улуска тааржыр ажылчын олуттар тып алырынга болгаш ажыл берикчилеринге ажылчыннар тыварынга дузалажыры. Инженерлер, тудугжулар, дагжылар, литий болгаш полиметаллдар тывыкчылары мурнады дарый херек мергежилдер. Эрзин кожууннуң девискээринде тывыш черинде республиканың 800 ажыг чурттакчызы ажылда хаара туттунган. Ажыл дилээн кижилерни, эксперттерни, регионнуң улуг компанияларын чаңгыс черге чыыптар чылдың кол болуушкуну болганы чугаажок.
Ажылчын олуттар ярмарказы чаңчыл езугаар ийи чадада эртип турар. Бирээде, регионалдыг чадазы бо чылдың апрельде болган. Ярмарканың федерадыг чадазы бүгү чуртка чаңгыс хүнде дөрт дугаар чыл эртип турары бо. Национал паркка үш тускай шөлдерни тургускан. 30 ажыг улуг компаниялар болгаш организациялар 1000 хире хостуг ажылчын олуттарны бараалгаткан.
«Инвестиция компанияларындан, янзы-бүрү яамылар болгаш ведомстволардан, база өске-даа албан черлеринден хостуг ажылчын олуттарны ярмаркадан тып ап болур силер. Тудуг кампаниязының республикада идепкейлиг чоруп турары-биле, тудугжулар, дашчылар, механизаторлар, сварщик- тер чугула херек болуп турар» – деп, ТР-ниң Чонну ажылга хаара тудар төвүнүң удуртукчузу Айлана Бюрбю чугаалаан.
Тускай шериг операциязының хоочуннарынга болгаш амгы үеде шериг албанын эрттирип турар шериг албанныгларның өг-бүлелеринче онза кичээнгейни салып турар: оларга ажыл дилээриниң болгаш чаа мергежил чедип алыр өөредилгелер талазы-биле консультацияларны организастаан.
«Кол сорулга- выс – хамаатыларга тааржыр ажылдарны тып алырынга, а ажыл берикчилеринге херектиг мергежилдерни дилеп турар кижилерин тып алырынга дузалажыры. "Амгы үеде инженер мергежилдер дыка негеттинип турар. Ол ышкаш даг-болбаазырадылга комбинаттарын дериг-херекселдер-биле хандырар болгаш комбинаттар тудар ажылчыннар база негеттинип турар. Ол дээрге литий болгаш полиметалл рудалар казып тывар элээн улуг бүдүрүлгелер-дир» – деп, Тыва Республиканың Чазааның Даргазының оралакчызы Орлан Сарыглар чугаалаан.
Эльбрусметалл-литий компаниязы ярмарканың кол киржикчизи болган. 2030 чылга чедир олар долу циклдыг металлургия комбинадын ажыдып, 1100 ажыг чаа ажылчын олуттарны тургузарын планнап турар. Ажылчын олуттар ярмарказы чылда чүс-чүс киржикчилерни ажылга хаара тудуп турар.
«Россети Сибирь» АН база Республиканың кадык камгалал болгаш эмчи профилактиказының төвү ярмаркага киришкен. Тываның күрүне университеди болгаш мергежилдиг ажылчыннарны белеткээр ортумак профессионал өөредилге черлери база акцияда киржип турар.
Эрткен чылын билдириишкиннерниң саны эвээш-даа болза, 6000 ажыг кижини ажылга хаара тударынга ярмарка дузалаан. Ол санны бо чылын улгаттырар сорулга салдынган.
«Эрткен чылын 16000 ажыг ажыл дилекчилериниң чүгле 6000 ажыын ажылче киирип шыдаан бис. Бо чылын ол сандан эвээш эвес, а харын-даа көвүдедирин чедип алыр ужурлуг бис. 7000-8000 хире хамаатыларывыс амгы үеде ажыл дилеп турар» – деп, Орлан Сарыглар немээн.
Ажылчын олуттар саналдаарындан аңгыда, ярмарканың аалчыларынга профессионал угланыышкынныг «Мергежилдер фестивалы» база болган. Школачылар, студентилер болгаш оларның ада-иелери келир үеде негеттинип турар мергежилдер дугайында билип алыр аргалыг болган.
Ярмарканың федералдыг чадазы Аныяктар хүнүнүң бүдүүзүнде чаңчыл езугаар эртип турарын демдеглээри чугула. Ол үеде дыка хөй студентилер, доозукчулар каяа ажылдаарын бодап эгелээн дээрзи билдингир.
/ А. ОНДАР белеткээн.
Ада ТЮЛЮШТУҢ тырттырган чуруктары.
“Шын” №25 2026 чылдың июль 2
"Шын" солуннуң МАХ-каналынга каттыжыңар: max.ru/join/egenQ...