Тыва Республиканың Баштыңы Владислав Ховалыгның айтыышкыны-биле, Кызыл кожууннуң Кур-Чер суурнуң чоогунда Үш-Хады-Эмектиг деп черде кызыгаарлыг хемчеглерни киирген.
Бода малдың онза айыылдыг аарыг — сибирь язвазындан аараанындан карантинни чарлаан. Тус чер чурттакчызының хууда дузалал ажыл-агыйында малдан сибирь язвазының халдавырын тыпкан. Аарыгны кижилерже болгаш мал-маганче оон ыңай тарап нептерээрин болдурбас дээш, кызыгаарлаан хемчеглерни киирген.
Чазак Даргазының оралакчызының албан-хүлээлгезин күүседип турар Алик Монгушка онза байдал талазы-биле ниити ажылды чорударын дааскан.
Тываның ветеринарлыг лабораториязы бода малдың өлгенинге лабораторлуг шинчилелди чоруткан. Май 17-де анализ түңнели ук аарыгның барын бадыткаан.
Амгы үеде аарыгның тывылган черинде ведомстволар аразының комиссиязы ажылдап, санитар-эпидемиологтуг хемчеглерни ап турар.
Кызыгаарлаан хемчеглер үезинде, Кызыл кожууннуң Кур-Чер суурнуң чоогунда Үш-Хады-Эмектиг черден мал-маганны, ыт, диисти үндүрүп-киирерин, өске кожууннарже малды ай дээрин, көдээ ажыл-агый база бажыңга азыраар дириг амытаннарны, мал продуктуларын садарын, ыттар болгаш диистер делгелгезин эрттирин хораан.