Ырап эрткен чашкы шаамны
Ында-хаая сактып кээр мен.
Чүден артык чырык сылдыс
Чүрээм өттүр чивеш-ле дээр.
Кыстың, оолдуң хөрээн каастаан
Кызыл сылдыс чайынналган,
Октябряттар – хөглүг чаштар
Отрядка чыскаалган бис!
Үр-даа болбаан, бистиң отряд
Үстүп чаштаан чинчи ышкаш,
Эргилдениң шуурганынга
Эзиннелдир бөөлдеткен…
Удуур, ойнаар, номчуур, бижиир
Узун хүннүг школага
Өөрлерим – хөглүг чаштар
Өөренип кирипкен бис.
«Тергиин эки өөрен!» – дээштиң,
Пионержи акы, угба
Демир-үжүк, кыдыраашты
Биске сөңнеп, хайырлаан-даа.
Ойта дүжүп, миннип чадап,
Оран-чуртун чидирипкен.
Доозун, туман доюлдурган,
Тозан чылдар чаштары бис.
Дагып чораан сандан ыяш
Дазылындан турулган дег,
Ужур-чөптүң, эки-бактың
Утказы-даа тывылбастаан.
Ээргииштелген шуурган-хаттың
Эң-не күштүг казыргызы
Чашкы шаавыс таварза-даа,
Чалдам чокка турушкан бис.
Эге билиг чадазы боор
Эрги чавыт школавыс.
Элеш кынныр чүве-ле чок,
Ээнзиргей турар чүңүл?
Самдарарып элей берген,
Интернат боор школавыс,
Сагыш өөртүр чүве-ле чок,
Ийлеп арткан ужуруң чүл?
Ынчалза-даа чажырбас мен,
Ыят чокка сөглексээр мен.
Өзүм-баарым чылдып чораан
Өндүр угаан өргээзи сен!
Он бир чылдың нүүрүнде
Оолдар, кыстар өөрүм-биле
Кызыл галстук баглаваан бол,
Кызып чорааш, дооскан бис.
Кыстың, оолдуң хөрээн каастаан,
Кызыл сылдыс чайынналган,
Эрткен-барган төөгү шагның
Эң-не сөөлгү салгалы бис.
Тозан чылдар шуужуп эрткен,
Доозун, туман чоорту ыраан…
Ийи муң чыл эжиин ажып,
Идегелдиг базыпкан бис…
Согунналган чидиг, чырык,
Шолбанналган кызыл сылдыс.
Эң-не башкы, эң-не сөөлгү,
Эң-не эргим шаңналым-дыр.
Хаан-Херети болуп алгаш,
Курбустуже ужа берген.
Кайгамчыктыг эки шагның
Кудуруундан туттунган бис:
Кыстың, оолдуң хөрээн каастаан
Кызыл сылдыс чайынналган,
Октябряттар – хөглүг чаштар
Отрядка чыскаалган бис!
03.03.2023
Буян ЕНДАН.
"Шын" №38 2023 чылдың май 27