Кызыл хоорайның чагыргазы «Таарымчалыг хоорай хүрээлеңин хевирлээри» федералдыг төлевилел езугаар чурттакчылардан санал-оналдарны хүлээп эгелээнин чарлаан. 2026 чылдың февраль 5-ке чедир хоорайның чурттакчылары 2027 чылда эде чаартыксап турар девискээрни саналдап киирип болур.
«Кызылдың шупту чурттакчыларын хоорайының хөгжүлдезинге боттарының үлүг-хуузун киириштиреринче кыйгырып тур бис» — деп, мэрия демдеглээн. — Силер кандыг-даа хөй-ниити девискээрин экижидер дугайында, азы көңгүс чаа черни тудуп тургузарының дугайында саналды киирип болур силер. Келир үе дээш бадылаашкынга силерниң бодалыңар чугула черни ээлээр».
2026 чылдың февраль 5-ке чедир санал-оналдарны ийи арга-биле хүлээп алыр: Кызылдың Бухтуев кудумчузунуң 3 дугаар бажыңынга ажыл хүннеринде 8 шак 30 минутадан 17 шак 30 минута чедир (дүштеки дыштанылга 12 шактан 13 шакка чедир) азы diokyzyl@yandex.ru электроннуг почтаже боду киирер.
Консультация алырда 8 (394-22) 3-38-87 азы 8 (394-22) 3-18-17 дугаарлыг телефоннарже долгап болур.
Шупту санал-оналдарны чыгган соонда, хоорайның рейтингилиг ниити соңгулдазынче киирер кордакчы девискээрлерниң даңзызын тургузар. Чурттакчы чон төнчү шилилгени кылыр апаар.
Россияның Президентизи Владимир Путинниң даалгазы-биле 2017 чылдан эгелеп «Амыдыралга инфраструктура» национал төлевилелдиң таарымчалыг хоорай хүрээлеңин тургузар федералдыг төлевилел боттанып турар. Ол үелер дургузунда Тываның найысылалында 16 хөй-ниити шөлдерин тудуп, чаагайжыттынган, а бүдүн республикада 161 хөй-ниити шөлдери төлевилелге киришкен.
ТР-ниң Чазааның парлалга албаны.