Владислав Ховалыг ЦСКА спорт комплекизиниң тудуунга хамаарыштыр чогуур яамылар болгаш ведомстволарның удуртукчулары база Кызыл хоорай мэриязы-биле ажылчын ужуражылганы эрттирген. Республиканың удуртукчузунуң бодалы-биле алырга, келир үениң комплекизи спорт, армия болгаш ниитилелди каттыштырар ужурлуг күштүг, кадык база идепкейжи Тываның демдээ апаар ужурлуг.
Объектиниң турар черин, хемчээлин болгаш чедингирин ужуражылга үезинде сайгарган. Хоорай чагыргазының саналдааны элээн каш аргаларны база өөренип көрген.
«Бүгү-ле негелделерге дүгжүп, спортчуларга, хоорай чурттакчыларынга, аалчыларга-даа таарымчалыг байдалды тургузуп турар черни шилип алыр ужурлуг бис. Келир үеде комплекс найысылалдың спортчу амыдыралының езулуг төвү апаарынга бүзүрээр мен. Ол ийи чугула сорулганы күүседир, бирээде, ЦСКА-Тыва школазынга амгы үениң белеткел инфраструктуразын хандырар, аңаа чаа чемпионнарны өстүрер. Ийиде, комплекс кижи бүрүзүнге ажык болур» - деп, Владислав Ховалыг ужуражылга соонда чугаалаан.
Республиканың Баштыңы харыысалгалыг албан черлери база боттарының санал-оналдарын ажылдап кылырын дааскан. Спортчу тудугга хамаарышкан төнчү шиитпирни, объектини тударының айтырыгларын Россияның армиязының төп спортчу клувунуң удуртулгазы-биле дугуржур.
Эрткен неделяда Россияның Камгалал яамызы Тываның Чазааның ЦСКА-Тыва спорт школазынга спорт комплекизин тудар дугайында дилээнге чогумчалыг харыыны бергенин сагындыраал.
Россияның Айыыл чок чорук чөвүлелиниң секретары Сергей Шойгунуң деткимчези-биле 2015 чылда Кызылда ажыттынган спортчу комплекс республиканың уругларынга бокс, дзюдо, хүреш, шыдыраа, уран гимнастика деп спорттуң беш аңгы олимпийжи хевирлеринге белеткелдерни чорудар арганы берген. Амгы үеде школада 310 уруг өөренип турар.
ТР-ниң Чазааның парлалга албаны.