Август 10-да Совет Тываның 5 чыл аттыг стадионунга Күш-культуржулар хүнүнге тураскааткан «CrossFit Games» деп ат-биле республика чергелиг кроссфит маргылдаазы болуп эрткен. Киржикчилер аразынга дуржулгалыг-даа, чаа эгелеп турар-даа спортчулар келген.
Совет эвилелиниң үезинде бо байырлалды кончуг улуг хемчээлдиг кылдыр эрттирип турган. Август айның 2 дугаар субботазында массалыг спортчу хемчеглер, күш-культуржулар чыскаалы, янзы-бүрү маргылдаалар эртер. Ол чаңчыл амгы Россияда-даа, Тывада-даа кадагалаттынып арткан.
Маргылдаага үш кижиден тургустунган командалар бөлүк мергежилгелерни кылган. Баштай 400 метрге чарышкан, ооң соонда штанга-биле мергежилгелер кылган. Хемчегге улуг болгаш элээди командалар база “Чаңгыс демниг Россия” партиязының идепкейжилери киришкен.
“Спорт кымны сорук киирип турарыл, шуптузунга Күш-культуржулар хүнү-биле байыр чедирип тур мен. Бистиң республикавыста спортту болгаш кадык амыдырал тударын деткиир улуг хемчээлдиг хемчеглер болуп эртип турар. Партиядан коллегаларым-биле кады шак мындыг хемчеглерге киржип турарымга өөрүп тур мен. Бис бодувустуң үлегер-чижээвис-биле спорт чугула дээрзин көргүзер ужурлуг бис” – деп, диетолог эмчи, Тываның Медицина палатазының эргелелиниң даргазы Анджела Канчыыр-оол демдеглээн.
Командалар аразынга маргылдаалар соонда боду дээш ойнаар хемчеглер эгелээн. Бо спортчу хемчег бүгү-ле назы-харның болгаш янзы-бүрү ажыл-агыйның кижилерин каттыштырган. Киржикчилер аразында ылаңгыя кроссфитке сонуургалдыг аныяк спортчуларны көөрге өөрүнчүг дээрзин организаторларның бирээзи Илья Загайнов демдеглээн.
Чуруктарны “ТуваМедиаБөлүктен” алган.