Кайгамчыктыг чараш ыры “Балгазынның кежээлери” дээш өске-даа нептереңгей ырыларның сөстериниң автору ажылчын чогаалчы Виктор Сагаан-оолдуң 100 харынга тураскааткан ужуражылга Кызыл кожууннуң төп библиотеказынга эрткен. Аңаа чогаалчының уруглары, номчукчулар, композиторлар, ыраажылар, чогаалчылар болгаш журналистер келген.
Чогаалчының уруу Мария Сагаан-оол ачазының дугайында ужуражылгага келгеннерге чугаалап берген. Ачазы кезээде карманынга блокнот биле карандашты ап чораанын, ажылдап тургаш безин, блокнодунга одуругларны бижип алырын демдеглээн.
Виктор Биче-оолович Сагаан-оол-биле таныш-көрүш чораан чогаалчылар Черлиг-оол Куулар, Сайлыкмаа Комбу, Александр Шоюн, чогаалчының чогаадыкчы ажылының дугайында солуннарга, радио-телевидениеге чырыдып турган журналистер Татьяна Байынды, Шаңгыр-оол Суваң олар Виктор Сагаан-оолдуң дугайында сактып чугаалааннар.
“Балгазынның кежээлери” ырының аялгазының автору композитор Владимир Серен, ыраажылар Алексей Арат-оол, Сылдыс Мандан-оол олар ужуражылгага келгеннерге аян тудуп, Виктор Сагаан-оолдуң шүлүктеринге бижиттинген ырыларны ырлааннар.
Күш-ажылдың хоочуну уран номчулганың тергиини, республика болгаш Россия чергелиг мөөрейлерниң каш дакпыр лауреады Шаңгыр Ондар Тываның орус болгаш тыва чогаалчыларның шүлүктерин номчуурга, ужуражылганың киржикчилери Шаңгыр Алдын-ооловнаның шүлүктерни номчуурун магадап дыңнааннар.
Тываның улустуң чогаалчызы Черлиг-оол Куулар шүлүкчү Виктор Сагаан-оолдуң ырылар апарган шүлүктериниң дугайында чугаалап тура, “Өлүм чок ыры – аас-кежик” деп шүлүктээн.
Ол ылап-ла – ындыг!
Ш. МОҢГУШ.
Авторнуң тырттырган чуруктары база интернеттен алган.
“Шын” №71 2024 чылдың сентябрь 18