2025 чылда Тываның кадыкшылга лагерьлеринге уругларның дыштанылгазының өртээ 1,5 хуудан эвээш эвес өзер. Уругларның дыштанылга лагерьлериниң путевказының чаа өртек-үнезин республиканың Чазаа эрткен чылдың деңнелинге колдуу дең чыгыы кылдыр доктааткан.
Чаңгыс уругга бир сезонда 21 хонук хоорайдан дашкаар лагерьге дыштанырга, өртээ 17 808 рубль болур — 2024 чылды бодаарга 651 рубль өскен. Лагерьге чаңгыс хүн турарга 848 рубль.
Хүндүскү лагерьлерге шак-ла ындыг сезоннуң өртээ 6299,4 рубль болур азы чаңгыс уругга бир хүнде 300 рубль. 2024 чылда хүндүскү лагерь өртээ 283 рубль эвээш турган. Майгынныг лагерьниң өртээ 199,4 рубльга өскен — 4935 рубльдан 5134,4 рубльга чедир.
ТР-ниң Өөредилге яамызының тайылбыры-биле алырга, путевкалар өртээнге колдуунда ажыл төлевириниң кудуку деңнелиниң өскени (2025 чылдың январь 1-ден тура хары угда 6076,2 рубльга өскен) салдарлыг болган. Аңаа дүүштүр уругларның дыштанылгазын хандырар ажылдакчыларның шалың төлевири өскен.
Чамдык уругларның чайгы дыштанылгазын бүрүнү-биле республиканың бюджединден төлээр. Аңаа тускай шериг операциязының киржикчилериниң, хөй ажы-төлдүг өг-бүлелерниң ажы-төлү, кадыы кызыгаарлыг уруглар, ол ышкаш амыдыралдың берге байдалынга таварышкан уруглар хамааржыр.
Республиканың стационар лагерлеринче путевканы боттары садып алган өг-бүлелер сезон төнчүзүнде путевканың өртээниң 50 хуузун эгидип ап болур. Ол ада-иелер октябрь 1-ге чедир Күрүнениң ачы-дуза порталынга чогуур билдириишкинни долдурары эргежок чугула.
Сибирьниң регионнарының аразында Тывада уруглар лагерьлеринче путевка өртектери эң-не чиик дээрзин демдеглээр апаар. Чижээ, кожа Хакасияда хоорайдан дашкаар лагерьге уругну үш неделя дыштандырары дээш доктааткан өртээ 31 500 рубль. Красноярск крайда ол дээш 35 681 рубль, Алтайда— 44 399 рубль, Даг-Алтайда — 33 020 рубль.
ТР-ниң Өөредилге яамызының медээлеринден алырга, 2025 чылда республикага 175 дыштанылга лагерин ажыдары планнаттынып турар, ооң иштинде 22 стационар, 149 хүндүскү база 4 майгынныг лагерьлер. Чай дургузунда олар 18,4 муң уругну хүлээп алырынга белен. Баштай хүндүскү лагерьлер ажылдап эгелээр. Стационар лагерьлер июнь 15-тен тура, доктааткан график езугаар, ажыттынып эгелээр.
Бистиң корр.
Чурукту интернет четкизинден хоолгалаан.
“Шын” №13 2025 чылдың апрель 10