«Өлчей» лицей чаа өөредилге чылын чаарттынган оран-савага уткуур

Хөй чылдар иштинде чедир туттунмаан турган Ак-Довурактың 4 дугаар школазын 2004 чылда ажыглалга киирген. Школаны 2020 чылда «Өлчей» лицейи деп эде адааш, ооң өөредилге программазын база лицей негелделеринге дүүштүр эде тургускан. Ам бо хүнде ында 867 сургуул 2 ээлчегде өөренип турар.

Республиканың өске школаларынга көөрде, чоокта чаа ажыглалче кирген школаны бо чылдың капитал септелге программазынче чүге кииргенил деп айтырыг тургустунуп кээп болур.

Ол айтырыгга лицейниң директору Артур Куулар: «Чаа школаның оран-савазы хөй чылдар иштинде чедир туттунмаан тудуглар санынче кирип турган болгаш, ону 2004 чылда ажыглалче киирген соонда, ооң элеп-эргилээри дүрген болган. Ынчангаш Тываның Өөредилге яамызының тургускан тускай комиссиязы ону шинчилээш, бо чылын капитал септелге программазынче киирери эргежок чугула деп санаан».
Эрткен чылын капитал септелге программазынче кирген чамдык школаларга септелге ажылдары керээ ёзугаар көрдүнген хуусаазында доозулбаанын барымдаалааш, часкы, чайгы эки хүннерни долузу-биле ажыглаар сорулга-биле, «Өлчей» лицейниң өөреникчилерин Ак-Довурактың 1, 3 дугаар школаларының хостуг класстарынга, дөрткү улдуңда, өөренири-биле шилчиткен. Ынчалдыр оларга өөредилге программазы үзүлбээн, өөредилгези уламчылавышаан.

Школаның оран-савазының капитал септелгезин чорудар ажылды дуржулгалыг тудугжу, хууда сайгарлыкчы Ужар-оол Иргит чижилгелиг садыглажыышкынга киришкеш, ойнап алган.

Керээ ёзугаар, объектиниң капитал септелгезин бо чылдың август 1-ге чедир доозар деп айыткан. Чаа өөредилге чылын «Өлчей» лицейиниң өөреникчилери болгаш башкылары чаарттынган оран-савага уткуур ужурлуг.

Тываның Өөредилге яамызы лицейниң стол-сандайындан эгелээш шупту эт-севин, дериг-херекселин база чаартыр. Ону садып алыр садыглажыышкын аңгы болур.

Эрткен чылын Өвүрнүң Дус-Даг школазының капитал септелгезин кылып чоруткан хууда сайгарлыкчы Ужар-оол Иргиттиң удуртулгазы-биле, тудуг объектизинде бо хүннерде Ак-Довурактан 75 ажылчын, Чадаанадан 14 кижи составтыг бригада ажылдап турар. Олар школаның элеп-эргижирээн черлерин солууру-биле оларны адырып, ханаларын база чаартыр штукатур ажылдарын кылып эгелээннер. Школаның дээвиириниң чамдыызын солууру керээде көрдүнген. Одалга системазын, электри талазы-биле болгаш соңгаларны, эжиктерни, шаланы долузу-биле солуур ужурлуг. Ол ышкаш өртке удур сигнализацияны база чаартыр.

Тудуг организациязының удуртукчузу Ужар-оол Иргиттиң дооскан эртеми зоотехник-даа болза, ам бо хүнде Тывада арга-дуржулгазы улуг тудугжу деп санаттырып турар. Эрткен чылын Дус-Даг школазын чаартып септээринден аңгыда, ол Тываның аңгы-аңгы булуңнарында ыяш көвүрүглер тударынга, септээринге мергежий берген. Ооң тудуг бригадаларында бедик мергежилдиг ажылчыннар, специалистер чыглып келген. Олар Ужар-оол Александровичиниң удуртулгазы-биле, Ак-Довурактың «Өлчей» лицейиниң оран-савазының капитал септелгезин үезинде болгаш бедик шынарлыг кылып доозарынга чигзиниг чок деп болур! Школаның септелгезинде ооң ажылчыннары болгаш башкылары киржип турары база ону магадылап турар.

Бо чылдың 9, 11 класстар доозукчуларынга эгелей берген капитал септелге, шаптыктай бербес бе деп айтырыгга, «Өлчей» лицейниң директору Артур Куулар: «Чок, шаптыктавайн турар. Чүге дээрге доозукчуларның өөредилгези программа ёзугаар уламчылавышаан, шылгалдаларга белеткелдер база үзүл- бээн!» — деп тодаргай харыыны берген.

/ Мерген КЫРГЫС.
Буян ООРЖАКТЫҢ тырттырган чуруктары.

"Шын" №27 2023 чылдың апрель 15