Тываның Баштыңы Владислав Ховалыг Москвага Россияның Чазак Даргазының бирги оралакчызы Денис Мантуров-биле ажылчын ужуражылгага киришкен.
Үлетпүр, энергетика, транспорт адырында чугула төлевилелдерни боттандырарынга федералдыг чазак биле регионнуң аразында кады ажылдажылганы база стратегтиг адырларны хөгжүдер орук картазын сайгарган. Кызылдың агломерациязында энергетика инфраструктуразын хөгжүдеринче онза кичээнгейни угландырган. Россияның Чазааның 2021 чылдың декабрьда бадылааны регионнуң үлетпүр болгаш социал адырларында энергия-биле хандырылга талазы-биле инвестиция төлевилелдериниң комплекстиг планының чорудуун Чазак Даргазының бирги оралакчызынга ол илеткээн.
Ужуражылганың база бир темазы «Хөй-ниити транспортун хөгжүдери» деп федералдыг программаның «Амыдырал инфраструктуразы» национал төлевилелиниң күүселдези болган. 2024 чылдың төнчүзүнде хөй-ниити транспорту 48 хуу чаарттынган турган. Тус черниң бюджет хемчеглериниң болгаш Сбербанк Лизинг-биле лизинг керээлериниң ачызында ам 60 хуу четкен. 2030 чылга чедир 85 хууга чедирер сорулганы салып, ажылды уламчылаар дээрзин Тываның Баштыңы демдеглээн.
Төп Евразийжи транспорт коридорунга чүък сөөртүр баазаны хөгжүдер айтырыгны база чугаалашкан. Амгы үеде Төп Евразийжи транспорт коридорунуң техника-экономиктиг үндезиннерин кылыр ажылдар чоруп турар. Ол айтырыгны бо чылын июль айда Денис Мантуровтуң Тывага ажыл-агыйжы сургакчылаашкынының үезинде көдүрген. Ол үеде Чазак Даргазының бирги оралакчызы регионнуң бүдүрүлге талазы-биле күчү-күжү болгаш даг-тывыш адырының кол төлевилелдериниң боттанылгазының эгелээшкиннери-биле таныжып көрген.
Чыжыргана СААЯ белеткээн.
Чурукту ТР-ниң Чазааның парлалга албанындан алган.
“Шын” №46 2025 чылдың ноябрь 27