Тываның Баштыңы Владислав Ховалыг биле Луганск Улус Республиканың Свердловск районунуң Свердловск хоорайының удуртукчузу Андрей Сухачёвтуң аразында чардынган кады ажылдажылганың дугайында дугуржулганың иштинге бистиң республика Россияның чаа регионунуң школачыларының чайгы дыштанылгазын организастаарынга дузалажыр.
Тываның Өөредилге яамызының дыңнадып турары-биле алырга, республика ЛУР-нуң Свердловск районунуң болгаш Свердловск хоорайының уругларынга Ростов областың Таганрог хоорайында «Золотая коса» деп уругларның кадыкшыдылга лагеринге дыштаныр 100 путевканы садып алырынга 3,8 сая рубльди үндүрүп берип турар. Аңаа дыштанылганың сезону эгелей берген болгаш ол август 29-та доостур.
Тываның өөредилге сайыды Елена Хардикованың демдеглээни-биле алырга, чаа өөредилге чылының бүдүүзүнде уруглар ыявыла дыштанып, күш кирип алыр ужурлуглар.
Бо болза Тываның Луганск Улус Республиканың Свердловск районга болгаш Свердловск хоорайынга боттандырып турары ийиги төлевилели болур. Бо хүннерде Тываның эрге-чагыргаларының күжү-биле Свердловск хоорайның тускайжыттынган 6 дугаар школазының спорт залының үндезин септелгези чоруп турар. Оран-саваның эргижирээниниң ужун мооң мурнунда күш-культура кичээлдерин өөредилге класстарынга, коридорга база кудумчуга эрттирип турган. Ам төлевилелдиң иштинге спорт залының дээвиирин, чылыдылга системазын, иштики ажылдарны кылыр. Ону өөредилге чылының бетинде дужаары көрдүнген. Ол ышкаш Тываның деткимчези-биле Свердловскиде подпольщик угбашкылар Лидия биле Светлана Бабарицкихлер аттыг 1 дугаар лицейни септээр. Ук ажылдарны 2025 чылда чорудары көрдүнүп турар. 2024 чылда ЛУР-нуң база бир хоорайынга, Червонопартизанскиге, 15 дугаар уруглар садын чаартыр.
Тываның Баштыңы Владислав Ховалыг моон-даа соңгаар ЛУР-нуң Свердловск районунга катап тургустунарынга, амыдыралдың чаңчылчаан овур-хевиринче дагын эглип келиринге, кады ажылдажылганың культурлуг болгаш өөредилге программаларын хөгжүдеринге дузалажыр.
Енисей Сибириниң өске арткан регионнары-биле кады Тыва Свердловск районун болгаш ооң төвүн шефке ап, тус черниң инфраструктуразын болгаш социал объектилерни катап тургусчур болган. Кады ажылдажылганың дугайында дугуржулганы май 9-та Шахтерлар алдарының музейинге чарган.
Ат салыышкынының езулалында Свердловск хоорайның баштыңы Андрей Сухачёв мынча деп демдеглээн: "Бодувустуң экономикавысты, үлетпүр бүдүрүлгелерин бут кырынга тургузуп алгаш, бистиң дузавыска хереглелдиг регионнарга дузалажып чеде бээривисти хүлээнип тур бис".
Свердловск район ЛУР-нуң мурнуу-чөөн талазында чыдар, 100 муң хире чурттакчылыг. Хоорайның болгаш районнуң экономиказының кол адыры – даг-тывыш үлепүрү болгаш көдээ ажыл-агый болур.
ТР-ниң Чазааның медээзин А.ХЕРТЕК очулдурган.