2025 чылда Россияның Социал фондуларынга Улуг назылыгларга харылзаа төптери Тываның “мөңгүн назылыг” 18 муң ажыг чурттакчызын хаара туткан.
Үш чыл бурунгаар бодунуң ажылдап эгелээн үезинден тура “Улуг назылыгларга харылзаа төптери” төлевилел “мөңгүн” назылыг кижилерни каттыштырыпкан улуг хемчээлдиг бүгү-российжи эгелээшкин апарган. Тыва Республикада шак ындыг 13 төп боттарының ажылын боттандырып, улуг назылыгларга 2 муң ажыг хемчегни эрттирген. Ук хемчеглерге 18,5 муң ажыг кижи киришкен.
Россияның Социал фондузунуң Тыва Республикада салбырының клиентилер албаннарының баазаларында организастаттынган бо төптер улуг назылыгларга идепкейлиг сайзыраар канчаар-даа аажок улуг арганы берип турар. Ында саң-хөө болгаш компьютер билиглерин чедирер, интернет четкизинге айыыл чок чоруктуң дугайында сагындырар өөредиглиг хемчеглер доктаамал болуп турар. Ол ышкаш ында кырган-ава, кырган-ачалар ук хемчеглерге, мастер-класстарга боттарының чогаадыкчы талаларын ажыдып, шупту катчып алгаш, үнүүшкүннерже, экскурсияларже чоруп, чогаал кежээлеринге болгаш дириг-чурук клубтарынга хостуг үезин аянныг болгаш ажыктыг кылдыр эрттирип турарлар.
1941-1945 чылдарның Ада-чурттуң Улуг дайынының Тиилелгезиниң 80 чылдаанында болгаш Ада-чурттуң камгалакчыларының чылында төпке келген улуг назылыгларга патриотчу ажыл канчаар-даа аажок улуг ужур-уткалыг болган. Эрткен чылдың эгезинде “Салгалдарга дириг сактыышкын” деп чаа төлевилел эгелээн. Ук төлевилелге даянып, дайынчы хөделиишкиннер хоочуннары, Ада-чурттуң Улуг дайынының киржикчилериниң салгалдары, кадеттер-биле удаа-дараа ужуражылгаларны кылган. Оларның темазы чаңгыс-ла Тывадан дайын киржикчилериниң болгаш тылдың эки турачыларының маадырлыг чоруктарының дугайында сактыышкынны кылыры.
Ол ышкаш Өвүр кожууннуң төвү Хандагайты суурга 13 дугаар Улуг назылыгларның харылзаа төвүнүң ажыттынганы регионга улуг ужур-уткалыг болуушкун болган. Ук төп база-ла өске кожууннарда дег Социал төптүң салбырында улуг назылыгларны харылзаштырып, өөредип, боттарын сайзырадырынга чаа-чаа аргаларны ажыдып турар. Ооң байырлыг ажыдыышкыны эрткен чылдың сентябрь 16-да болуп эрткен. Аңаа Россияның Социал фондузунуң ТР-де салбырының даргазы Часкал Дараа, чазак-чагырганың төлээлери база өске кожууннарның Харылзаа төптериниң идепкейжилери байырын чедирип, өвүржүлерниң өөрүшкүзүн үлешкеннер.
ТШО-да киржип турар дайынчыларны деткип, дузалажыр волонтёржу ажыл Улуг назылыгларның харылзаа төптериниң ажыл-ижинге улуг рольду ойнап турар. Эрткен чылын идепкейжи пенсионерлер дайынчыларга, машина-техникага, боо-чепсекке чаштынар четкилерни аргааннар. Ол ышкаш боттарының холу-биле оңгу лааларын, шарыышкыннарны, идик оъттарын кылганнар. Гуманитарлыг дуза кылдыр арыгланыр херекселдерни, чиңнээр пластырьларны, ыжыкка удур мазьтарны, Тываның тайга-таңдызындан чыггаш, кургаткан эм үнүштерни чоруткан. Дайынчыларга эң-не онзагай чүүл оларның төрээн чер-чуртун сагындырып келир эът, чиңге-тараа, курут дээш өске-даа национал аъш-чем болган.
Улуг назылыгларның харылзаа төптери дээрге анаа-ла ындыг хостуг үезин эрттирер чер эвес-тир. Олар улуг назылыгларның амыдыралчы дуржулгазын, патриотчу чоруун, күчү-күжүн ажыктыг ажыл-ишче хуулдурупкан черлер-дир. Хоочуннарның кылган ажыл-ижи келир салгалга бистиң төөгүвүстү кадагалап арттырарынга, фронтуда дайынчыларывыска эгээртинмес дузаны чедиреринге дузалыг: https://sfr.gov.ru/branches/tuva. Баш удур бижидилге чокка бүгү-ле күзелдиг кижилерни Социал фонд ажылдакчылары манап турар.
Айтырыглар бар болза, Социал фондунуң чаңгыс аай харылзаа төвүнче долгапкаш, айтырып ап болур 8-800-100-00-01 (долгаары халас).
Чыжыргана СААЯ белеткээн.
Чуруктарны СФ-тиң ТР-де парлалга албанындан алган.
“Шын” №5 2026 чылдың февраль 12