Тыва Республиканың Чазааның 2024 чылдың апрель 17-ден тура 210-р дугаар Айтыышкыны-биле алдарлыг организакчы эмчи, республиканың кадык камгалалының алдарлыг ажылдакчызы, Кадык камгалалының тергиини, Таңды кожууннуң хүндүлүг хамаатызы Мөңгүн-оол Тамбаевич Оюннуң адын Таңды кожууннуң төп эмнелгезинге тывыскан. Ындыг шиитпирни “Тыва Республикада шылгараңгай ажылдакчыларның, алдарлыг кижилерниң адын, төөгүлүг болуушкуннарны болгаш тураскаалдыг хүннерни мөңгежидериниң дугайында” 1948 ВХ-1 дугаар хоойлуга даянып хүлээп алган.
Мөңгүн-оол Оюн медицина адырынга хөй чылдар дургузунда ажылдааш, Тываның медицина эртемнериниң хөгжүлдезинге улуг үлүг-хуузун киирген. Ол Медицина-социал нарын айтырыглар болгаш ооң эргелелиниң эртем-шинчилел институдунуң баштайгы директорунуң албан-хүлээлгезин күүседип турган.
Алдарлыг эмчи 1952 чылдың март 26-да Тыва автономнуг обласка Таңды кожууннуң Сосновка суурга төрүттүнген. 1980 чылда Томскунуң күрүнениң медицина институдун, 1998 чылда Кемеровонуң күрүне университединиң “Бүдүрүлге чериниң экономиказы болгаш эргелели” деп мергежилин доозуп алган. 1971–1974 чылдарда Тес-Хемниң төп эмнелгезинге дүрген дуза чедирер фельдшер кылдыр ажылдап турган.
1980–1992 чылдарда Чөөн-Хемчиктиң төп эмнелгезинге хирургтап чораан. 1992–2012 чылдарда Таңдының төп эмнелгезин удурткан. Эмнелге чери 2003 чылда ооң удуртулгазынга тургаш, сааттыг болгаш чаа чиигээн иелерге дузалажыр медицина системазынче чаа технологияларны кииргени дээш “Чаш төлге эки сеткилдиг эмнелге чери” деп хүндүлүг атты алган. 2008 чылда ол-ла бедик атты база катап бадыткаан.
Чыжыргана СААЯ.
«Шын» №31 2024 чылдың апрель 24