Иркутск хоорайның “Байкал Арена“ деп спорт комплекизинге ноябрь 25–26 хүннеринде Олимпий оюннарының 2012 чылда чемпиону, 2016 чылда мөңгүн медалының эдилекчизи Наталья Воробёвага тураскааткан 9 дугаар бүгү Россия чергелиг маргылдаа болган. Аңаа Сибирьниң 11 регионундан спортчулар киришкен. Бистиң республиканы 13 мөге кыс база дуржулгалыг тренерлер Сайзаана Куулар, Айдың Достай баштаан өске-даа тренерлер төлээлээн. Тываның мөге кыстары маргылдааның эң-не хөй алдын медальдарын чаалап алганнар.
Баштай 16 хар чедир уруглар аразынга 54 килге Лилия Байыр бүзүрелдии-биле бирги черни алгаш, эштериниң хей-аъдын көдүрген. Ол-ла килге ЦСКА-Тыва спорт школадан эжи Долунчаана Чооду база Улуг-Хемден Даң-Хаяа Адыг 3-кү черге төлептиг болганнар. Дараазында 39 килге Мөңгүн-Тайгадан Аңгырак Монгуш бүзүрелдиг хүрешкеш, 1-ги черни, 3-кү черни Кызылдың 18 дугаар школазының өөреникчизи Кадын-Ай Донгак алганнар.
Элээди уруглар аразынга тергиин чараш хүрешти көргүскен тиилекчи мөге кыстар: 53 килге 1-ги черни Тана Тюлюш, 57 килге 1-ги черни Менди Шогжап, 62 килге 1-ги черни Киш-Кулаа Кыргыс, 3-кү шаңналдыг черлерни 53 килге Камила Каранмай база 59 килге Белек Сат үлешкеннер.
Тиилекчилер болгаш шаңнал кирген мөге кыстарның тренер башкылары: Россияның алдарлыг спорт мастери Л. Ооржак база А. Достай, С. Куулар база С. Ооржак.
Найысылалда "Херел" спорт өргээзинге ноябрь 30-де Тыва Республиканың Олимпийжи эвилелиниң 10 чылдаан оюнга тураскааткан хостуг хүреш маргылдаазы болган. Аңаа 11 кожуундан 2011–2012 чылдарда төрүттүнген элээди 60 спортчу киришкен.
ЦСКА-Тыва спорт школазының тренер башкызы Сайзаана Кууларның өөреникчилери эки түңнелдерни маргылдаага көргүскеннер. Ева Түлүш (46 кг) удурланыкчыларын шуптузун чарын кырынга арыг базып, бүзүрелдии-биле 1-ги черни ап, турнирниң маадыры болган. Милана Соян (39 кг) 2-ги черни, Честек-Кат Ондар (36 кг) 3 дугаар черни алган.
Тренер башкы Сайзаана Куулар өөреникчилерин боттарының деңнели-биле эки хүрешкенин демдеглээш, декабрь 13–15 хүннеринде Кызылга болур регионнар аразының “Енисейская Сибирь” маргылдаазынга эки киржир күзелин илереткен.
Алексей ЧАМБАЛ-ООЛ.
Чуруктарны интернеттен алган.
“Шын” №95 2023 чылдың декабрь 13