Хандагайты суурнуң «Дамырак» уруглар садында келир үениң чемпионнарын өөредип турар. Бичии мөгелерни уруглар садында аныяк башкы, күш-культура талазы-биле инструктор Очураш Донгак башкылап турар. Ол Өвүр кожууннуң начын мөгези. Бичии уруглар-биле ажылдаарга, өөрүшкү болгаш сеткил ханыышкынын бээр деп ол чугаалаар.
Очураш Орлан-ооловичиниң ажылының аргазы — бодунуң үлегерин көргүзери болгаш башкы биле өөреникчиниң аразынга бүзүрелди оттурары. Башкы уруг бүрүзүнге амы-хуу хамаарылганы болгаш кичээнгейни салып турар. Ынчангаш башкының өөреникчилери спортчу хемчеглерге, ылаңгыя тыва хүрешке, улуг чедиишкиннерлиг.
Уруглар садында «Мөгениң өө» деп аттыг өөредилге шөлчүгежинде бичии оолдар солун, чаа билиглерни болгаш чаңчылдарны өөренип турар. Ында чүгле күш-культурага эвес, а чуртталганың үнелиг чүүлдеринге база өөредир. Өөредилгениң бир дугаар хүнүнден эгелээш-ле, улугларны хүндүлээр, тура-соруктуг, кызымаккай болгаш шупту чүүлдерге чүгле тергиин болурун өөредип эгелээр.
Ооң кижизиттирикчилери спортчу маргылдааларда тиилеп турар. Уруглары шиитпирлиг болгаш тодаргай сорулгалыг апарганын ада-иелер чугаалап турар.
А. СОЯН белеткээн.
Чуруктарны болгаш медээни ТР-ниң Өөредилге яамызының социал четкиде арнындан алган.
“Шын” №29 2025 чылдың июль 31Лайк