Эрзин кожууннуң Мөрен сумузунда чаа фельдшер- акушер пунктузунуң тудуу адакталган. Мөренчилер чаа эмнелгелиг болурунга аажок өөрүп турар бис.
Эмнелге тудуунда «алдын холдуг» тудугжу оолдар ажылдап турар. Кымнарыл дээрге Мерген Матпыс-оол, Эрес Даңгыт, Валентин Дирчин, Артыш Аракчаа-дыр. Оларның бригадири Артыш Дамба боду база тудугжулары-биле деңге ажылдап турарын көрүп тур бис, эр хейлер.
Тудугжуларны эки хоолулуг изиг аъш-чем күш киирер болгай. Ынчангаш оолдарны улуг повар Маргарита Дамба хүннүң-не дыка чаагай аъш-чем-биле чемгерип турар. Маргарита Бадыевнаның холу чемзиг, аажы-чаңы аажок эвилең-ээлдек кижи болду.
Эрес-кежээ тудугжу оолдарывыска Мөренниң бүгү-ле чурттакчыларының мурнундан четтиргенивисти илередир-дир бис.
Чечекмаа САДИ.
Эрзин кожуун, Мөрен сумузу.
"Шын" №57, 2023 чылдың август 2