УТТУНДУРБАС АТ
ССРЭ үезиниң “Маадыр ие” деп хүндүлүг адын дагын эгидериниң дугайында улус-чон идепкейлиг саналдаан соонда, РФ-тиң Президентизи Владимир Путин ындыг атты российжи ниитилелге катап эгиткен.
Ук хүндүлүг атты 1944 чылда үндезилеп тургускан. Ол 1991 чылга чедир иениң белен эвес үүлезин онзалаар, хөй ажы-төлдү өстүрүп, төлептиг мөзү-бүдүшке кижизиткен аваны чон аразындан ылгап демдеглээр ат болуп келген.
Тываларның аразындан ол хүндүлүг ат-биле шаңнаткан иелер эвээш эвес. Төөгүге элеп читпес адын арттырган Социалистиг Күш-ажылдың маадыры Кандан Үрүле база Маадыр ие кижи.
“Маадыр ие” деп атты 10 болгаш оон хөй ажы-төлдү божаан (азыраан) херээженге тыпсыр. Аңаа шаалда кылдыр 1 сая рубль хемчээлдиг чаңгыс удааның төлевирин тургускан.
“АДА-ИЕНИҢ АЛДАРЫ” ОРДЕН БОЛГАШ МЕДАЛЬ
Ол ышкаш бистиң чуртта 2008 чылдан тура “Ада-иениң алдары” орден болгаш медальды үндезилеп тургускан. Ооң-биле чеди болгаш оон хөй ажы-төлдү өстүрүп кижизиткен өг-бүлелер шаңнадыр. Ада-иелер албан езузу-биле бадылашкан РФ-тиң хамаатылары болур, хеймер төлү үш хардан биче назылыг болбас ужурлуг. Өг-бүлелерге негелделер мындыг: ажы-төлү дээш ажаанзыраар, амыдыралдың кадык овур-хевирин сагыыр, саң-хөө талазы-биле өре-шире чок болур ужурлуг. Орден 500 000 рубль хемчээлдиг төлевирлиг.
Орден-биле дөмей аттыг, шак-ла ындыг негелделерлиг “Ада-иениң алдары” медальды дөрт болгаш оон хөй ажы-төлдү өстүрүп кижизиткен өг-бүлелерге тыпсыр. 200 000 рубль төлевирлиг.
Бистиң корр.