Июль 25-те Кызылдың Арат шөлүнге болуп эрткен «Маадырлар болгаш тиилелгелер» деп көжүп чоруур фото-делгелгениң байырлыг ажыдыышкынынга Тываның Баштыңы Владислав Ховалыг киришкен. Президент Владимир Путинниң чарлааны Ада-чурт камгалакчызының чылынга тураскааткан «Маадырлар болгаш тиилелгелер» деп делгелге Россияның шериг-төөгү ниитилелиниң регионалдыг салбырының киржилгези-биле кылдынган.
Экспозицияда бистиң чуртувустуң аңгы-аңгы булуңнарындан тускай шериг операциязының 19 маадырының, оларның аразында Тыва Республикадан Россияның Маадырлары Мерген Донгак, Чалым Чүлдүм-оол, Буян Кууларның, «Эрес-дидим чоруктуң» ийи ордениниң эдилекчилери (мөчээниниң соонда) Орлан Куулар, Валентин Доспан, Субудай Ооржактың болгаш эмчи сестразы ефрейтор Айдысмаа Монгуштуң чуруктары бар.
Делгелгениң байырлыг ажыдыышкынынга Россияның шериг-төөгү ниитилелиниң регионалдыг политика департаментизиниң директору Аяна Шойгу, Тыва Республика талазы-биле федералдыг кол инспектор Александр Вавилихин, Тыва Республиканың Дээди Хуралының (парламентизиниң) даргазы Каң-оол Даваа, регионнуң хоойлу-дүрүм талазы-биле удуртукчулары, Кызылда 55-ки гвардейжи тускай даг-адыгжы бригаданың шеригжилери болгаш Россияның Маадыры Чалым Чүлдүм-оол, ефрейтор Айдысмаа Монгуш, тускай шериг операциязының «Эрес-дидим чорук» орденниң ийи катап эдилекчилери (мөчээн соонда) Орлан Куулар, Субудай Ооржак база Валентин Доспанның чоок кижилери болгаш төрелдери киришкен.
Тываның Баштыңы хемчегниң киржикчилеринге байыр чедирип, ажыттынган делгелгениң аныяк салгалдың патриотчу кижизидилгезинге онза ужур-дузазын демдеглээн:
– Россияның Президентизи Владимир Владимирович Путин 2025 чылды Ада-чурт камгалакчызының чылы кылдыр чарлаан. Ол дээрге бистиң Төрээн чуртувустуң амыр-тайбыңын болгаш хамаарышпас чоруун камгалап турар бүгү-ле шериг албанныгларның дайынчы күш-ажылын болгаш бодун өргүп чоруурун үнелээни-дир. Россияның шериг-төөгүлүг ниитилелиниң ачызында бо делгелгениң материалдары Россияның Маадырларының алдар-хүндүзүн сактып, хүндүлеп чоруур аныяк-өскенге төрээн чуртунга ынакшылдың көскү үлегери болур – деп, Владислав Ховалыг демдеглээн.
Россияның шериг-төөгү ниитилелиниң регионалдыг политика департаментизиниң директору Аяна Шойгу, чуруктар экспозициязын белеткээринге делгелгениң маадырлары боттары база оларның өг-бүлелери хууда архивтеринден аңгы-аңгы чылдарда тырттырган чуруктары-биле үлежип, дузазын көргүскенин демдеглээн.
"Бо чуруктар — Россияның шиитпирлиг үезинде ёзулуг Маадырлар болган оолдарның өөредилгезиниң болгаш сонуургалының, спортчу чедиишкиннериниң болгаш шериг албан-хүлээлгезиниң дугайында биске чугаалап бээр. Бөгүн бистиң делгем чуртувустуң бүгү чоннарының төлээлери тайбың болгаш Россияның келир үези дээш демисежип чоруур. Оларның эрес-дидим чоруу бистиң чуртувустуң төөгүзүнче кезээ мөңгеде киир бижиттинген. «Маадырлар болгаш тиилелгелер» деп делгелге дээрге бистиң чуртувустуң сонуургалдарын камгалап турар ТШО-да шупту шериг албанныгларга хүндүткел болгаш мөгейиишкин-дир» — деп, Аяна Шойгу хемчегниң киржикчилеринге чугаалаан.
Төрээн чуртунуң мурнунга хүлээлгезин күүседип чорааш, амы-тынындан чарылган, ынчалза-даа эрес-дидим чоруктуң үлегери болуп, дайынчы эштериниң болгаш төрелдериниң сактыышкыннарынга кезээ мөңгеде артып калган маадырларга, ол ышкаш өг-бүлелеринге хүндүткелдиң болгаш ханы кажыыдалдың демдээ — сактыышкын минутазын чарлаан.
«Маадырлар болгаш тиилелгелер» деп көжүп чоруур чуруктар делгелгезин Ада-чурттуң алдар ады дээш тулчуп, бедик күрүне шаңналдарынга, ооң иштинде Россия Федерациязының Маадыры деп атка төлептиг болган, Ада-чурттуң Улуг дайынының болгаш тускай шериг операциязының киржикчилеринге тураскааткан. Тускай шериг операциязының үезинде 360 ажыг шериг албанныглар «Алдын сылдыс» шаңналының эдилекчилери болган.
"Тускай шериг операциязында бистиң дайынчыларывыс-биле ужурашкан мен, фронтуда оолдарывыска кайы хире бергезин билир мен. Олар ёзулуг маадырлар-дыр. Оларга берге, ынчалза-даа бүгү-ле чүвени кылып шыдаар күштү олар тып ап турар. Оларның маадырлыг чоруунуң ачызында бистиң чуртувус чөптүг чорук дээш демиселге тиилеп турган болгаш тиилээр. Россияның Маадырларының эрес-дидим чоруун кезээ мөңгеде сактып, хүндүлеп чоруур бис!" — деп, Тываның Баштыңы Владислав Ховалыг демдеглээн.
«Маадырлар болгаш тиилелгелер» төлевилелиниң ачызында Ада-чурттуң Маадырларының, ооң иштинде тыва чаңгыс чер чурттугларывыстың амыдырал-чуртталгазының болгаш тиилелгезиниң дугайында көргүзүп турар чуруктарны делгем чуртувустуң аңгы-аңгы хоорайларындан көрүп болур.
Бистиң корр.
Буян ООРЖАКТЫҢ тырттырган чуруктары.
“Шын” №29 2025 чылдың июль 31